Milliy Meclis reisi BMT (OON) qırımtatarlarnı qorumağa çağırdı

29.09.201420:35

Qırımtatar Milliy Meclis reisi Refat Çubarov BMT Qırım boyunca mahsus vazifeni tayin etmege ve onıñ Qırımda daima çalışması içün huquq ve diger maddelerni belgilemege çağırdı.

Bu aqta o Nyu Yorkta olıp keçken tamır halqlarnıñ halqara konferentsıyasındaki çıqışında bildirdi. Em de Qırımtatarlar BMT –nıñ tamır halqlarnıñ haqları amelge keçirilmesinde devletlerniñ areket ve ğayretlerini taqip etmek, esabat bermek, qorumaq ve işbirlikte bulunmaq aqqına malik olğan mahsus organnıñ teşkil etilmesini desteklergenini bildirdi.

“Lâkin Qırımdaki vaziyetke köre, qırımtatarlarnıñ havfsızlığı içün ğayet telükeli devir olğanını közge alıp, böyle organ meydanğa ketirilmesini beklep olamaymız. Şu sebepten de, BMT Qırım boyunca mahsus vazifeni tayin etmege ve onıñ Qırımda daima çalışması içün huquq ve diger maddelerni belgilemege çağıramız”,-dep qayd etti Refat Çubarov.

Bundan da ğayrı, Çubarov Ukraina parlamentine Ukraina tamır halqlar haqları boyunca BMT deklaratsıyasına qoşulmaq qararı ve qırımtatarlarnı Qırımnıñ tamır halqı olaraq tanığanı içün minnetdarlıqnı bildirdi.

Author: Редакция AVDET

Редакция AVDET