Sabriye Erecepova – qırımtatar halqınıñ yır ve oyun baylığını yüksek professional seviyede numayış etken yırcılardan biri.
Efsaneviy yırcınıñ sesi er bir insannıñ hayalında Qırımnıñ dülberligini canlandıra edi. Onıñ sesi er bir qırımtatarnıñ yüreginde yañğıray edi. Bu yıl iyülniñ 12-de onıñ doğğanına 104 yıl toldı. Avdet öz oquycılarına olar daa belki körmegen unikal fotolarnen tanış olmağa teklif ete.
Sabriye Erecepova 1912 senesi iyülniñ 12-de Bağçarayda oca Kerim Cemilevniñ qorantasında dünyağa keldi. Anası, Sayde-hanum, şair Cemil Kermençikliniñ tatası edi. Mektepte oquğanda qırımtatar tili ve edebiyatı boyunca Osman Aqçoqraqlıdan ders aldı.
1950 senesi sentâbrniñ 15-de o halq duşmanı dep yaqalandı ve 25 yılğa azatlıqtan marum etildi. Apshanede vaziyeti pek ağır olğanına baqmadan, o özüni tüşünmey edi, diger yaqalanğanlar aqqında qayğıra edi. Tek 1956 senesi martnıñ 12-de onıñ cinaiy işi qapatılıp, o azat etildi. 1967 senesi dekabrniñ 18-de onı aqladılar.
Sabriye Erecepovanı er kes sevip saya edi, onıñ onıñ resimlerini körgen, yırlarını eşitken er bir insan ömür boyu onıñ mühlisi olıp qala edi.
Halq yırlarınıñ çoqusı Sabriye-hanumnıñ icadı sayesinde bu künge qadar saqlanıp qaldı.
Menba: Sabriye Erecepova “Menim enişli-yoquşlı ve çeçekli yollarım”. Hatıra kitabı.