Qırımda dindar qırımtatar oğlanı ğayıp oldı

01.10.201619:09

Qırımda endi 6 kün devamında Sudaq civarındaki Kapsihor (Morskoye) köyüniñ sakini Remzi Osmanov ile bağ yoq.

Onıñ ğayıp olğanı aqqında ana-babası haber etti.

Eki balanıñ babası, 32- yaşındaki Remzi Osmanov babalarından ayrı yaşay edi, soñki sefer olar sentâbrniñ 25-de onnen telefon vastasınen bağlandılar. Bazarertesi, sentâbrniñ 26-da onıñ ile bağ endi yoq edi.

Sudaq sakini, faalci Lenora Dülberniñ bildirgenine köre, onıñ Daewoo Lanos A 803 hv yengil maşnası da coyulğan.

“Remziniñ soy-aqrabaları ve dostları onı merametli, yuvaş insan olaraq bileler, o, qurucı olıp çalışa edi, iç bir siyasiy tedbir ve aktsiyalarda iştirak etmegen, dindar oğlan edi”, – dep ikâye etti Lenora Dülber.

Remzi Osmanovnıñ yaqınları onıñ ğayıp olğanı aqqında ariza yazdılar.

Author: Редакция AVDET

Редакция AVDET