Ğayıp olğan Remzi Osmanov Tataristandan Qırımğa qayta

05.10.201614:35

Sentâbr 26-da ğayıp olğan Qapsihor (Morskoye) sakini Remzi Osmanov tapıldı ve evge qayta.

Bu aqta onıñ dostu Seyran İkrimah Facebook saifesinde bildirdi.

Onıñ sözlerine binaen, Osmanov Tataristanda bulundı, amma taqiqatçılar onıñ Qırımdan çıqmağanı aqqında bildirgen edi.

«Endi, ketkeni aqqında malümatnı saqlağanı içün, Qırımda onı yaqınlarından büyük qırımtatar ŞAMARı bekley», – dep yazdı onıñ dostu.

Bundan evel aqay kişiniñ haber etkenine binaen, Remzi Osmanov maşnasını Aqmescitteki dostunda qaldırdı ve dedi ki, beş künden soñ kelmese, apayına maşnanı alsın dep, aytsın.

Avdetniñ bildirgenine köre, Remzi Osmanov sentâbr 26-dan başlap, soy-soplarınen bağğa çıqmağan edi. Bir afta keçken soñ onıñ Daewoo Lanos А 803 ХВ maşnası Aqmescitte tapıldı. Oktâbr 4-te ise, o, Qazandan yaqınlarına telefon etip, bağğa çıqtı.

Author: Редакция AVDET

Редакция AVDET