Ay-Petride maşna çamurğa battı

17.10.201616:00

Keçken afta soñu Ay-Petride, Roka dağı rayonında içinde beş yolcu olğan Mitsubishi avtomobili çamurğa o qadar battı ki, aydavcı özü o yerden çıqıp olamadı, qurtarıcılarnı yardımğa çağırdı.

Fevqulade vaziyetler nazirligi (FVN) Qırım idaresi matbuat hızmetiniñ malümatına binaen, olarğa yardım köstermek içün Rusiye FVN-nıñ Qırım Cumhuriyeti boyunca Baş idaresiniñ Mahsuslaştırılğan taqımı qıdıruv-qurtaruv dağ bölüginiñ hadimleri yollanıldı. Mahsus tehnika vastasınen Rusiye FVN qurtarıcıları turistlerniñ avtomobilini çıqardı.

Maşnada Bağçasaray sakinleri, bunen beraber, bala bar edi. Olardan kimse tibbiy yardımğa muhtac degil edi.

Bundan da ğayrı, bazar künü FVN mutehassıslarınıñ yardımı Aşağı Otuz (Kurortnoye) köyü rayonında coyulğan turistlerni tapmaq içün kerek oldı. Qurtaruv hızmetine kelgen malümatqa binaen, adamlar aqşam yolunı tapalmadı.

«Qıdıruv-qurtaruv ameliyatı neticesinde turistler Baqsan (Mejgorye) köyünden 3 km uzaqlığında Çuyunça deresinde tapıldı. Aqmescitte yaşağan 54 yaşındaki qadın ve 58 yaşındaki aqay kişi, tibbiy yardımğa muhtac olmadı. Olarğa dağlarda areket etüv qideleri añlatıldı», — dep bildirdiler Fevqulade vaziyetler nazirliginde.

Author: Редакция AVDET

Редакция AVDET