Bağçasarayda tarihiy abide yoq etile

17.10.201611:03

Bağçasarayda, Hanlar sarayı yanındaki tarihiy binalardan birini yıqmağa başladılar. Bina Lenin soqağı, 97 adresi boyunca yerleşe.

«AN Krım» neşriniñ bildirgenine köre, yerli sakinler yañı memuriyet yolbaşçısı Aleksandr Trânovnıñ böyle areketlerinden qasevetlene.

Yerli mimarlar, abideni imaye etip, Bağçasaraynıñ asıl körünişini saqlamağa çağıra.

«Medeniy asabalıq abideleri saqlavı boyunca komitetten yollanılğan çoq mektüp bile keder etmedi. İşni becerecek şirket parasını endi aldı ve tarihiy binanı qısımlarğa ayıra», – dep bildire neşir.

Çoq vaqıt devamında Bağçasaray rayonı boyunca baş mimar vazifesinde bulunğan Valeriy Borisov, binanı yıqmaq kerekligi yoq olğanında emin.

«Onıñ yañıdan qurulması (tamir etilmesi) mümkün, em de bu daa ücüz olur edi, – dep añlata o. – Bundan da ğayrı, 2011 senesi Kiyev Abide saqlav tedqiqatı İlmiy-tedqiqiy İnstitutı Han sarayı yanında saqlanılğan zonalarnı belgilev işlerini alıp bardı. Ve bu bina saqlav zonasına kire».

Medeniy asabalıq abideleri saqlavı boyunca komitetke binanı tarihiy-medeniy qorulğan obyekt olaraq tanımaq muracaatınen eki ariza yollanıdlı.

Medeniy asabalıq abideleri saqlavı boyunca komitette bildirdiler ki, Bağçasaray memuriyeti adına bütün yıqma ve yañı qurucılıqlarnı uyğunlaştırmaq talabınen eñ azdan üç mektüp yollanıldı. Amma buña iç cevap olmadı. O vaqıt, komitet reisiniñ muavini Vâçeslav Zarubinniñ sözlerine binaen, prokuraturağa muracaat etildi.

Bağçasarayda ise, binanı endi yıqıp başladılar.

Memuriyet yolbaşçısı Aleksandr Trânovnıñ bildirgenine köre, bina alınıñ qazaiy olğanı tanıldı ve onıñ yıqtırılması kerek. Buña memurnıñ tehnikiy neticesi bar, demek ki, «yıqmaq, tamir etmek mümkün degil» cümlesinde vergul doğru qoyulğan.

17_10_2016_lenina_97

Author: Редакция AVDET

Редакция AVDET