Oktâbr 20-de, cumaaqşamı künü Qırım Yuqarı mahkemesi Enver Mamutov, Remzi Memetov, Rustem Abiltarov ve Zevri Abseitovnıñ apellâtsion şikâyet arizasını qanaatlendirmedi.
Bu aqta malümat «Qırım birdemligi» birleşmesiniñ Facebook saifesinde bildirile.
Mahkeme toplaşuvı devamında video bağ qullanıldı.
Avdetniñ bildirgenine köre, oktâbr 8-de mahkeme, dört Bağçasaray sakininiñ apiste bulunma müddetini 2017 senesi yanvar 11-ge qadar devam ettirmek qararını aldı.
Mayıs 12-de Bağçasarayda rusiyeli uquq qoruyıcılar musulmanlarnıñ evlerinde, bunen beraber, yerli «Salaçıq» qavehanesinde bir sıra tintüvler keçirdi. Neticede Zevri Abseitov, Remzi Memetov, Rustem Abiltarov ve Enver Mamutov yaqalandı. Olar, Rusiyede terroristik tanılğan «Hizb ut-Tahrir» teşkilâtınen bağlı olğanında şeklenile.