FSB Aqyarda ukrain diversiya taqımı yaqalanğanı aqqında bildire

10.11.201613:00

Rusiye Federal havfsızlıq hızmetiniñ Cemaatçılıqnen alâqa merkezi, sanki Qırımdaki arbiy obyektlerde diversiyalar azırlağan, Ukraina Mudafaa nazirliginiñ diversiya taqımınıñ azaları Aqyarda yaqalanğanı aqqında haber ete.

«2016 senesi noyabr 9-da Federal havfsızlıq hızmeti Aqyar şeerinde Ukraina Mudafaa nazirligi Baş istihbarat idaresiniñ diversiya-terroristik taqımınıñ azalarını tuttı, olar Qırım yarımadasındaki arbiy infrastruktura ve ayat teminlevi obyektlerinde diversiya aktsiyalarını keçirmege planlaştırğan edi», – dep bildirdiler FSB Cemaatçılıqnen alâqa merkezinde.

FSB-nıñ malümatına binaen, yaqalanğan kişilerden patlatıcı aletler, silâ, mahsus ağ vastaları ve olarnıñ cinayet faaliyetiniñ diger delilleri, bu cümleden, planlaştırılğan diversiyalarnıñ obyekt haritaları alındı.

Şimdiki vaqıtta yaqalanğan kişilerge nisbeten cezalav belgilene. Operativ-qıdıruv tedbirleri ve taqiqat faaliyeti devam ete, dep qayd ettiler müessisede.

Aqyar uquq qoruyıcı organlarındaki menbanıñ malümatına esaslanğan TASS-nıñ bildirgenine köre, ukrain diversantları boyunca mahkeme toplaşuvı şeerniñ Leninskiy rayon mahkemesinde qapalı şekilde keçirilecek.

Kiyev ise, Aqyarda FSB tarafından ukrain diversantları yaqalanğanı aqqında malümatnı red etti. Kerekli beyanat Ukraina Mudafaa nazirliginiñ resmiy saytında yerleştirildi.

Ukraina arbiy müessisesinde diversantlar aqqında malümatnıñ «nevbetteki feyk» olğanını ayttılar.

Avdetniñ bildirgenine köre, bu sene avgust ayında FSB diversant taqımı yaqalanğanı aqqında haber etti. Terroristlerniñ yaqalanması vaqtında ateş açılğanı neticesinde Rusiye FSB hadimi elâk oldı.

Author: Редакция AVDET

Редакция AVDET