Qırımda «Çiygoznıñ işi» boyunca nevbetteki toplaşuv keçirildi

10.11.20169:50

Noyabr 9-da Qırım Yuqarı mahkemesinde Qırımtatar Milliy Meclisi (Rusiyede yasaqlanğan – Avdet) reisiniñ muavini Ahtem Çiygoznıñ işi boyunca 37-ci toplaşuv keçirildi.

Toplaşuvda prokuror, vaqia yüz bergen vaqıtta yapılğan bir sıra şaatnıñ videolarınıñ seyir etilgeni aqqında protokolnı oqudı.

Bu aqta rusiyeli adliyeci Nikolay Polozov Facebook saifesinde paylaşqan video muracaatında bildirdi.

200-den ziyade videodan 4 videoda Ahtem Çiygoz körüne, bu videolarda körüne ki, o, kütleviy nizamsızlıq teşkil etilmesi boyunca iç areket etmedi, dep qayd etile protokolda.

Toplaşuvda, Polozovnıñ sözlerine binaen, tek bir şaat sorğuğa çekildi, o, Yuqarı Rada binasınıñ bekçisi edi. O, Ahtem Çiygoznı körmegen.

Noyabr 10-da Ahtem Çiygoznıñ işi boyunca nevbetteki toplaşuv başlandı.

Ahtem Çiygoz Aqmescit SİZO-sında 2015 senesi yanvar ayından başlap buluna, o, Rusiye Federatsiyası Cinaiy kodeksiniñ 212 maddesi 1-ci qısmı («kütleviy nizamsızlıqnı teşkil etüv») boyunca qabaatlana, madde boyunca qabaatlanğan kişi 10 yılğa qadar apiske qapatıla bile.

2016 senesi aprel 26-da Qırım Yuqarı mahkemesi Qırımtatar Milliy Meclisiniñ ekstremistik teşkilât olğanını tanıdı ve Rusiyede onıñ faaliyetini yasaq etti. Sentâbr 29-da Rusiye Yuqarı mahkemesi Meclisniñ yasaq etilmesi aqqında Qırım Yuqarı mahkemesiniñ qararını tasdıqladı.

Author: Редакция AVDET

Редакция AVDET