Krasnoperekopskta 15 yaşındaki qız özüni öldürdi

23.11.201612:38

Noyabr 22-de Krasnoperekopskta 15 yaşındaki qız, Vkontakte içtimaiy ağındaki gruppalarnıñ birinde muzakerelerden soñ, özüni öldürdi.

Qız (onıñ adı edep sebeplerinden bildirilmey), pozitiv, faal, sınıfdaşları arasında itibarlı edi. Böyle sözlerni onıñ tanışları ayta. Mektep talebesi çeşit tögereklerge qatnay edi, resim yapmanen oğraşqan ve gitara çalğan edi. Onıñ ana-babası ayırılğan, qızğa anası bir özü terbiye berdi, qmma qorantadaki munasebetler yahşı edi, dep bildire «AN – Krım» agentligi.

Vaqia yüz bergeninden evel er şey hayırlı kibi körüngen edi: o, anasınen laf etken edi, er şey yahşı edi. Tahminlerge köre, Vkontakte içtimaiy ağındaki gruppalarnıñ birinde qız, öz özüni öldürüv aqqında beyanat yazdı, bundan soñ qız dostunen telefon vastasınen bağlandı. Bundan soñ o, 1-ci mikrorayonda yerleşken evinden çıqtı ve şeerniñ başqa tarafına ketti. 10-ci mikrorayonda qız doquz qatlı evlerniñ biriniñ damına çıqtı ve özüni öldürdi.

Uquq qoruyıcılar taqiqat alıp bara, qıznıñ içtimaiy ağındaki saifesini ve mektüpleşmesini ögrene.

Kütleviy haber vastalarınıñ bildirgen malümatına binaen, keçken afta Vkontakte içtimaiy ağındaki «ölüm gruppasınıñ» idarecisi Filipp Budeykin yaqalandı. O, Vkontaktede Filipp Lis dep qayd etilgen. Oña ösmürlerni özüni öldürüvlerge ketirgeni sebebinden resmiy qabaatlav taqdim etildi. Bundan da ğayrı, «ölüm gruppasınıñ» idarecisi ve iştirakçilerinde tintüvler keçirildi.

Rusiye Taqiqat komitetiniñ malümatına binaen, 2013 senesi dekabr ayından başlap 2016 senesi mayıs ayına qadar içtimaiy ağda bu kibi 8 cemiyet (gruppa) quruldı, bu yerde «özüni öldürüv açıq şekilde teşviq etile ve çağına yetmegen gençler özüni öldürmege çağırıla». Taqiqat komitetiniñ bildirgenine köre, «ölüm gruppalarından» 15 genç özüni öldürdi.

Author: Редакция AVDET

Редакция AVDET