Kolumbiyada uçaq qazağa oğradı

30.11.20169:12

Kolumbiyada içinde 81 insan bulunğan uçaq qazağa oğradı.

Çarter seferi Boliviyadan kolumbiyalı Medelinge kete edi. Onıñ içinde «Şapekoense» braziliyalı futbol klubınıñ azaları bulunğan.

Ava limanınıñ resmiy beyanatına köre, uçaq erkânı motor ile bağlı problemalar aqqında bildire edi. Yerli kütleviy haber vastaları bildire ki, uçucılar yaqarlıqnıñ az olğanı aqqında işaret bergen ve acele enecek edi.

İlk malümatlarğa binaen, uçaq dağlarğa uruldı.

Şeer akimiyetiniñ sözlerine köre, eñ azdan 25 insan elâk oldı, dep bildire Airlive agentligi. Bunen beraber, La-Seha yanğıncıları qayd etti ki, 27 adam elak olğandır. Sağ qalğanlarnıñ sayısı, farqlı malümatlarğa binaen, altıdan on beşke qadardır.

Haber etilgenine köre, uçaq yolcuları arasında Braziliya çempionatınıñ A kategoriyasında oynağan Şapeko şeerinden «Şapekoense» taqımınıñ futbolcıları bar edi. Olar, çarşenbe künü Medelin şeerinde yerli «Atletiko» taqımınen oynacaq edi.

Author: Редакция AVDET

Редакция AVDET