Avropa birligi resmiy olaraq Rusiyege qarşı sanktsiyalarnı devam ettirdi

20.12.201610:35

Avropa birligi resmiy olaraq 2017 senesi iyül 31-ge qadar Rusiyege qarşı sanktsiyalarnı devam ettirdi, sanktsiyalar kelecek sene yanvar ayında yekünlenecek edi. Moskvağa nisbeten sıñırlama tedbirleri Qırımnıñ Rusiyege qoşulması ve Ukraina cenübiy şarqında davanen bağlı.

Avropa birligi Şurasınıñ beyanatında bildirilgenine köre, 2015 senesi mart 19-da Avropa şurası sanktsiyalarnıñ müddetini Minsk añlaşmalarınıñ bütünley ömürge keçirilmesine bağlamağa añlaştı.

Dekabr 15-te belli oldı ki, Avropa birliginiñ aza-devletleri liderleri Moskvağa qarşı sanktsiyalarnı daa yarım yılğa uzattırdı.

Rusiyege qarşı sektor iqtisadiy sanktsiyalarnıñ müddeti 2017 senesi yanvar 31-de yekünlene.

Sanktsiyalar, Moskva Minsk añlaşmalarını yerine ketirgen soñ, lâğu etilecek. 2015 senesi fevral ayında Minsk şeerinde Ukraina cenübiy şarqında vaziyetniñ eyileşmesi boyunca añlaşma imzalandı. Añlaşma boyunca, ateş toqtatılmaq, davalaşqan taraflarnıñ sıñırından ağır arbiy tehnika alınmaq, bunen beraber, Ukrainada Anayasa islâatı keçirilmek kerek.

Author: Редакция AVDET

Редакция AVDET