Rusiye ve Ukraina ombudsmenleri «fevral 26» işi boyunca yaqalanğanlarnen körüşti

27.12.20169:25

Dekabr 26-da Qırımnı Ukraina ve Rusiye insan aqları boyunca vekâletliler Valeriya Lutkovskaya ve Tatyana Moskalkova ziyaret etti. Olar SİZO-da bulunğan «fevral 26» işi boyunca yaqalanğan Ahtem Çiygoz, Ali Asanov ve Mustafa Degermenci ile beraberlikte muzakereler keçirdi.

Ahtem Çiygoz ile ombudsmenlerniñ körüşüvinde mahkemede onıñ cemaat imayecisi olğan onıñ apayı Elmira Ablâlimova ve adliyeci Nikolay Polozov bulundı.

Onıñ sözlerine köre, Ahtem Çiygoz obudsmenlerniñ diqqatını «qırımtatarlarğa nisbeten repressiyalarğa» celp etti. Bundan da ğayrı, Çiygoz onıñ vatandaşlığı meselesini muzakere etti.

Ombudsmenler ögünde Ahtem Çiygoznıñ vatandaş tibbiy müessisesinde, yani SİZO tışında, mustaqil tibbiy teşkerüvden keçirilmesi, bunen beraber, Çiygoznıñ cezasını apiste bulunmasınen bağlı olmağan cezağa deñiştirmek imkânı meselesi meydanğa ketirildi.

Çiygoznen körüşüvden soñ Moskalkova ve Lutkovskaya Ali Asanov ve Mustafa Degermenci ile körüşti.

Bu, Moskalkovanıñ «fevral 26» işi boyunca yaqalanğanlarnen endi ekinci körüşüvi oldı. Bu sene mayıs ayında Moskalkova, bu cümleden, Qırımtatar Milliy Meclisi (Rusiye Federatsiyasında 2016 senesi aprel 26-da qabul etilgen mahkeme qararınen yasaqlanğan) azalarınen körüşti.

Avdetniñ bildirgenine köre, iyün 21-de Minsk şeerinde Ukraina Yuqarı Radasınıñ insan aqları boyunca vekâletlisi Valeriya Lutkovskayanıñ rusiyeli ombudsmen Tatyana Moskalkova ile körüşüvi teşkil etildi. Körüşüvniñ esas mevzusı, Qırımda 2014 senesine qadar mahküm etilgen Ukraina vatandaşlarınıñ teslim etilmesi oldı.

Author: Редакция AVDET

Редакция AVDET