Aqmescitte «dört prezidentniñ mektebi» açıldı

29.12.201617:20

Bugün, dekabr 29-da Aqmescitteki Bor Çoqraq (Fontanı) qasabasında çoq yıl devamında qurulğan mektep tantanalı şekilde açıldı.

Açılış merasiminde resmiy şahıslar ve mektepte tasil qırımtatar tilinde berilmesi içün büyük isse qoşqan yerli sakinler bulundı.

Qırım yolbaşçısı Sergey Aksönov ilân etti ki, mektep içün «mahsus tasil programması» işlep çıqarılacaq, bunen beraber, evel bildirilgen edi ki, tasil eki tilde (qırımtatar ve rus) berilecek.

«Bu yerde yahşı ocalar kollektivi saylanıla. Eminim ki, bütün vazifeler tolusınen ömürge keçirilecek. Şimdi Qırım Tasil nazirligi tarafından tasil programması azırlanıla, tasil berüv tiline istekke köre, sınıflar teşkil etilecek», – dedi o.

Mektepte 825 talebe oquycaq, bu yerde 33 sınıf olacaq. Birinci sınıfqa kirmek içün arizalar 2017 senesi fevral ayından başlap qabul etilecek.

44 sanlı oquv yurtunıñ müdiri vazifesine Akimova Eleonora Şevketovna tayinlendi. Onıñ ocalıq tecribesi 30 yıldan ziyadedir. Eleonora Akimova qorantasınen beraber 2003 senesi Qırım paytahtına köçip keldi. Bir yıl keçken soñ 40 sanlı mektepte muzıka ocası olıp çalışmağa başladı, bundan soñ oquv-terbiye işi boyunca müdir muavini oldı. Vatanğa qaytmazdan evel Eleonora Akimova 20 yıl devamında Özbekistanda muzıka mektebinde çalıştı.

«Mektepniñ esas vazifesi — ana tilini, qırımtatar tilini ğayrıdan canlandırmaqtır», — dep bildire «Rossiya dlâ vseh» neşri Eleonora Akimovanıñ sözlerini.

eleonora-akimova

shkola

fontani_mektep-4

fontani_mektep-5fontani_mektep-15fontani_mektep-6

shkola1

shkola2

shkola3 shkola2

Foto: QMDİ matbuat hızmeti, Gulnara İlyasova

Author: Редакция AVDET

Редакция AVDET