Süriyede ateş toqtatma nizamı kirsetildi

30.12.20168:30

Bugün gece ateş toqtatma nizamı kirsetildi. Rusiye ve Türkiye, çoq devam etken muzakerelerden soñ, añlaşıp oldı ve dekabr 30-dan yarı geceden başlap Süriyeniñ bütün toprağında ateş toqtatma aqqında añlaşmanıñ imzalanmasına irişti.

Bundan evel Rusiye Federatsiyası prezidenti Vladimir Putin ateş toqtatma boyunca añlaşma imzalanğanı ve barışıq muzakerelerni başlamağa azır olğanları aqqında bildirdi. Üç vesiqa imzalandı: birinci — Süriye ükümeti ve silâlı muhalifet arasında Süriye territoriyasında ateş toqtatma aqqında, ekinci — ateş toqtatma nizamını nezaret etüv boyunca tedbirler kompleksi, üçünci — Süriyedeki vaziyetni tüzetmek içün barışıq muzakerelerni başlamağa azırlıq aqqında ilân, dep bildire «RİA-Novosti».

Süriye davasında Rusiye ve İran ükümet quvetlerine qol tuta ve prezident Başar Asadğa, bu cümleden, arbiy destek köstere. Türkiye ise, 2011 senesinden başlap ükümet ordusınen cenkleşken muhalifetke qol tuta.

Author: Редакция AVDET

Редакция AVDET