Baarden başlap, orduğa çağırılğan Qırım sakinleri Rusiyeniñ diger regionlarında hızmet etecek

12.01.201712:10

Orduğa çağırılğan Qırım sakinleri, 2017 senesi baar çağıruvından başlap, Rusiyeniñ diger regionlarında hızmet etmege başlaycaq.

Bu aqta Rusiye Silâlı quvetler Baş ştabınıñ baş teşkiliy-mobilizatsion idaresiniñ yolbaşçısı Vasiliy Tonkoşkurov ilân etti.

Bundan evel, belli olğanına köre, Qırım sakinleri arbiy hızmet içün yarımada territoriyasındaki arbiy bölüklerge yollanılğan edi.

Vasiliy Tonkoşkurovnıñ sözlerine binaen, Qırım cumhuriyeti ve Aqyar şeeri sakinleri rusiyeli orduğa endi eki yıl devamında çağırıla.

Küz çağıruvı vaqtında 1480 insan rusiyeli orduğa hızmet etmege ketti.

2015-2016 seneleri devamında yarımadada yerleşken Rusiye Federatsiyasınıñ Cenübiy arbiy okrugı ve Milliy gvardiyasınıñ arbiy bölüklerine 4 biñden ziyade Qırım sakini yollanıldı. Olardan 900-den ziyade insan endi arbiy-deñiz mütehassısları oldı.

Telegramda kanalımızğa qoşulıñız ve eñ aktual ve meraqlı malümatlardan haberdar oluñız

Author: Редакция AVDET

Редакция AVDET