Yazıcı Viktor Şenderoviç ekstremizmnen qabaatlana

20.01.20179:15

Moskva Cemaat palatası azası Pavel Danilin Taqiqat komitetine yazıcı Viktor Şenderoviçniñ «Eho Moskvı» radiostantsiyasınıñ saytındaki blogda yazğan beyanatlarını ekstremizmnen bağlı olğanını teşkermek muracaatınen ariza yazdı.

Bu aqta Danilin Facebook saifesinde bildirdi. Onıñ sözlerine köre, qart-liberalnıñ beyanatlarından biri onı Rusiye vatandaşı olaraq aqaretledi.

Taqiqat komitetine ariza yazmanıñ sebebi, Şenderoviçniñ «rusiyelilerniñ elleri, genetik ananege binaen, k…ten öse» degen sözleri oldı. Bunen beraber, Danilinni onıñ sözleriniñ ekinci qısmı da aqaretledi: «… başı ise, «mahsus inkişaf yolu» dep adlandırılğan menfiy selektsiya neticesinde, çoqusı allarda yapraqnen toldurılğan». Umumen olaraq, qartnıñ metni Rusiye içtimaiy nizamını tenqit etüvge bağışlanğan.

2014 senesi Moskvadaki Preobrajenskiy mahkemesi Viktor Şenderoviçten million ruble para cöremesini almaq qararını çıqardı. Davanı Devlet Dumasındaki «Yedinaya Rossiya» fraktsiyasınıñ yetekçisi Vladimir Vasilyev şamatalı derclerden soñ açtırdı, o vaqıt maqalelerde Soçideki Olimpiada 1936 senesi Berlinde keçirilgen Oyunlarnen qıyaslandı.

Avdetniñ bildirgenine köre, yazıcı-liberal qırımtatarlarnıñ aqları bozulğanı aqqında da bir qaç sefer bildirgen edi. Hususan, qırımtatar faali Ervin İbragimovnıñ qaçırılmasına izaat berip, Viktor Şenderoviç Qırımnı «yarım asır evelsi olğan» Latin Amerika ve Çeçenistan ile qıyasladı.

Telegramda kanalımızğa qoşulıñız ve eñ aktual ve meraqlı malümatlardan haberdar oluñız

Author: Редакция AVDET

Редакция AVDET