«Çiygoznıñ işi» boyunca 76-ncı toplaşuvda maddiy deliller ögrenile edi

08.02.201710:35

Fevral 7-de Qırım Yuqarı mahkemesinde qırımtatar faali Ahtem Çiygoznıñ işi boyunca 76-ncı toplaşuv keçirildi, bu yerde 2014 senesi fevral 26-da keçken mitingden videolar taqdim etildi.

Adliyeci Nikolay Polozovnıñ fikrince, işbu maddiy deliller yaqalanğan Çiygozğa nisbeten taqdim etilgen qabaatlavlarnı red ete.

Bu aqta Polozov Facebook saifesinde yazdı.

Adliyeciniñ malümatına binaen, «umumen olaraq, dört video baqıldı. Olardan üçü – telekanallarnıñ haberleridir. Eki ukrain ve bir rusiyeli telekanaldan».

«Beşinci kanalnıñ videosında Çubarov ve Sençenkonıñ sözde bulunması kösterile. İç kütleviy nizamsızlıq alâmetleri yoq. Ekinci videoda Ahtem Çiygoznı körmek mümkün. Lâkin, o, qabaatlav oña qarşı bildirgen kibi iç areketler etmey», – dep ilân etti Polozov.

Bunen beraber o qayd etti ki, süjette Qırım Muhtar Cumhuriyeti Yuqarı Şurasınıñ sessiya zalı kösterildi.

«Kadrda onlarca insanlar körüne: deputatlar, mühbirler, spiker Konstantinov da bar. Bu kadr sırlı şaat «Petrovnıñ» delillerini red ete, o bildirgen edi ki, Çiygoz QMC Yuqarı Şurası binası yanında mitingni, deputatlar adam sürüsinden binağa keçmesin dep, teşkil etti», – dep yazdı Polozov.

Adliyeciniñ malümatına binaen, dörtünci videoda içki azbarda, «opolçenetsler», kazaklar ve Rusiye tarafını tutqan miting iştirakçileri bulunğan yerde yüz bergen vaqialar kösterildi.

«Miting iştirakçileri provokatorlarnı, «opolçenetsler» ve kazaklarnı içki azbardan sıqıp çıqarmağa başlağanda, «opolçenetsler» közyaş peyda etici gaznı qullanıp başladı. Sıquv devamında içki azbarda iç pus körünmey. Diger videolarda körüne edi ki, provokatorlar kiçik şişelerden ara-sıra Ukrainağa qol tutqan miting iştirakçilerine gaz sepe edi, bundan soñ «opolçenetslerniñ» arqasında saqlana edi. Lâkin, bazı zararlanğanlar ve qabaatlav şaatları aytqan kütleviy şekilde gaz qullanması aqqında malümatnı videolar tasdıqlamadı», – dep qayd etti Nikolay Polozov.

Ahtem Çiygoz Aqmescit SİZO-sında 2015 senesi yanvar ayından başlap buluna, o, Rusiye Federatsiyası Cinaiy kodeksiniñ 212 maddesi 1-ci qısmı («kütleviy nizamsızlıqnı teşkil etüv») boyunca qabaatlana, madde boyunca qabaatlanğan kişi 10 yılğa qadar apiske qapatıla bile.

Telegramda kanalımızğa qoşulıñız ve eñ aktual ve meraqlı malümatlardan haberdar oluñız

Author: Редакция AVDET

Редакция AVDET