Aqmescitte evde yüz bergen patlav neticesinde qadın elâk oldı

15.02.201713:15

Aqmescitteki (Simferopol) Gresovskiy köyünde beş qatlı evniñ dairelerinden birinde patlav yüz berdi, neticede qadın elâk oldı.

Fevqulade vaziyetler nazirliginiñ Qırım boyunca idaresi matbuat hızmetiniñ bildirgenine köre, vaqia Yabloçkov soqağı 22/9 adresi boyunca yerleşken 5 qatlı evniñ 4-ci qatında yüz berdi.

Vaqia neticesinde üç adam zararlandı. Esli-başlı qadın elâk oldı. Qurtarıcılar bir qaç daqqa içinde 4 kvadrat metrni qaplap alğan ateşni söndürdi, bunen beraber, binadan zararlanğanlarnıñ birini, esli-başlı aqay kişini çıqardı. Daa bir zararlanğan adam (1970 s. doğğan) özü binanı terk etti. Aqay kişiler Aqmescit 6-cı şeer hastahanesiniñ yanıq bölügine ketirildi.

Vaqia yüz bergen yerde belgilendi ki, patlav neticesinde pencereler zararlandı, binanıñ diger bozulmaları qayd etilmedi. Sakinler tahliye etilmedi.

Bu yerde Qırım Cumhuriyeti uquq qoruyıcı organlarınıñ mütehassıs patlav tehnikleri çalışa, olar fevqulade vaziyetniñ sebebini ögrene. «Krımgazseti» müessisesiniñ ilk malümatlarına binaen, gaz aletleriniñ yañlış qullanılması ya da gaz qaçuvı belgilenmedi.

Telegramda kanalımızğa qoşulıñız ve eñ aktual ve meraqlı malümatlardan haberdar oluñız

Author: Редакция AVDET

Редакция AVDET