Qırımda bir kün devamında beş avtomobil yandı

20.02.201720:00

Aqmescitte (Simferopol) bir kün devamında, fevral 19-20-de, VAZ markalı eki avtomobil yandı.

Şaatlarnıñ içtimaiy ağlarda bildirgenlerine köre, birinci vaqia bazar künü Kreyzer soqağında qayd etildi.

Şaatlarnıñ sözlerine binaen, VAZ-2115 maşnası yandı. Qayd etile ki, yanğan maşna yanında diger avtomobiller de tura edi, amma ateş olarğa keçmedi.

Ekinci yanğın GRES qasabasında bazarertesi künü saba qayd etildi. Vaqia yüz bergen yerde politsiya hadimleri çalıştı.

Bundan da ğayrı, Cumhuriyet Fevqulade vaziyetler nazirliginiñ matbuat hızmetinde Qırımda keçken kün devamında daa üç maşna yanğanını bildirdiler. Hususan, Qarasuvbazar (Belogorsk) rayonında VAZ-2101 avtomobili bütünley yandı, Qurman (Krasnogvardeyskoye) rayonında – VAZ-2106, Aqmescitteki Bulvarnaya soqağında – Peugeot avtomobili yandı, dep bildire «İskra».

Bütün bu vaqialar neticesinde kimse zararlanmadı.

Ekspertler yanğın sebeplerini ögrene.

Avdetniñ bildirgenine köre, fevral 5-te Livadiyada, Alupka yolunda VAZ-2110 maşnası yandı, onıñ devlet nomeri Т477ЕК, region 123. Ateş maşnanı bütünley yoq etti.

2016 senesi iyül 23-te avtomobillerni yaqqanınen şeklenilgen Müyeddin Alivapov çıqmama aqqında imza qoyıp yaqalavdan azat etildi.

Alupka sakini Müyeddin Alivapov yanvar 23-ten apiste buluna edi. O, Qırımnıñ Cenübiy yalısında avtomobillerni yaqqanınen qabaatlana edi. Lâkin, onıñ yaqalanğanından soñ da avtomobiller yaqmaları devam etti.

2017 senesi yanvar ayında Aluşta şeer mahkemesi keçken sene fevral-mart aylarında avtomobbilerni yaqqan Çelâbinsk sakinine qarşı qarar çıqarıp, onı bir yarım yılğa apiske qapattı. Bir afta devamında 23 maşna yaqıldı. Mahkeme Çelâbinsk sakinini bir yarım yılğa apiske qapatmaq qararını çıqardı.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

автопартнер_2

Author: Редакция AVDET

Редакция AVDET