Boris Nemtsov hatırasına bağışlanğan yürüşte qırımtatar kolonnası iştirak etti

27.02.20179:15

Fevral 26-da Moskvada keçirilgen Boris Nemtsov hatırasına yürüşte ayrı kolonnanen ketken qırımtatarlar da iştirak etti.

Bu kolonna teşkil etilmesiniñ teşebbüsçileri, rusiyeli adliyeciler Mark Feygin ve Nikolay Polozov oldılar. Kolonnada altı qırımtatar faali ve İlmi Umerovnıñ qızı Ayşe Umerova bulundılar. Bütün kolonna «Qırımda repressiyalarnı toqtatıñız! Ukrain siyasiy mabuslarını azat etiñiz!» şiarı ile kete edi. Adamlar, şiarlar aytıp, ellerinde qırımtatar ve Rusiye bayraqlarınen kete edi.

«Qırımda şimdi telüke astında uquq qoruyıcılar aytqanı kibi tek nasıldır şübeli adamlar degil de, amma qomşular, turaqlardaki adamlar da buluna. Üç adamdan ziyade toplaşqan er kes Qırımda telüke astında buluna!» – dep ilân etti Nikolay Polozov.

Rusiyeli faaller qırımtatarlarğa destek aktsiyalarını sıq-sıq keçire. Böyleliknen, er aynıñ 18-inde «Strategiya-18» bir kişilik piketler aktsiyası teşkil etile.

Qayd etmek kerek ki, 2015 senesi fevral 27-de öldürilgen muhalif siyasetçi Boris Nemtsovnıñ hatırasına fevral 26-da Moskva merkezinde keçirilgen yürüşte biñlerce adamlar iştirak etti.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция AVDET

Редакция AVDET