Aqmescit memuriyeti baş mimarnıñ işten boşatılması qanunğa uyğanını isbatlaycaq

02.03.201717:32

Aqmescit (Simferopol) memuriyeti sabıq baş şeer mimarı Ernst Mavlütovnıñ işten boşatılması qanunsız olğanı aqqında Aqmescit Merkeziy rayon mahkemesiniñ qararına şikâyet arizasını berecek ola.

Memuriyet yolbaşçısı Gennadiy Baharevniñ sözlerine köre, mahkemege Mavlütov qanun boyunca işten boşatılğanını isbatlağan deliller taqdim etilecektir.

«Sputnik v Krımu» radiosınıñ yayınında sözde bulunıp, Baharev ayttı ki, Mavlütovnıñ hastahane spravkası, qaysı birine esaslanıp onıñ işten boşatılması qanunsız sayılğan, evelden qayd etilgen tarih ile taqdim etildi. Bunen beraber, sabıq baş mimar iş yerinde buluna edi, vesiqalarnı resmiyleştire, çalışa ve toplaşuvlarda iştirak etken edi.

Merkeziy rayon mahkemesi qarar çıqarğan soñ Mavlütov işke kelmegen edi.

Aqmescit Merkeziy rayon mahkemesi fevral 28-de sabıq baş şeer mimarı Ernst Mavlütovnıñ onıñ işten boşatılması qanunsız olğanını tanıması ve vazifege yañıdan buyurmaq aqqı aqqında memuriyetke açqan davasını qanaatlendirdi.

Avdetniñ bildirgenine köre, Qırımğa Tataristandan kelgen Ernst Mavlütov Aqmescit baş mimarı vazifesinden noyabr ayında boşatıldı, bu vazifede o bir yarım yıl çalıştı. Bundan soñ Mavlütovnıñ fotoresimi şeer memuriyeti binasınıñ içinde açılğan «Qırım memurlarınıñ masqaralıq levhasında» yerleştirildi.

Foto: Aleksandr Polegenko

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция AVDET

Редакция AVDET