Mart 3-te aqşam Aqmescit (Simferopol) rayonındaki Acı Qal (Çistenkoye), Livadki, Yağmurça (Fontanı) köy sakinlerine haber etildi ki, olar şeerge barğan eki marşruttan biri lâğu etildi.
57 sanlı avtobuslar «Moskoltso-Livadki» marşrutı boyunca yüre edi, onıñ lâğu etilmesinden soñ Livadki köyüniñ sakinleri, şeerge zornen barıp yetmek içün, eñ yaqın №86 avtobusnıñ turağına qadar cayav tahminen bir yarım kilometr keçmek kerek olacaq.
Yerli akimiyetniñ böyle qararı köy sakinlerini pek açuvlattı.
Acı Qal köyü territorial cemaat idaresinde bildirdiler ki, №57 marşrutınıñ çalışması daa qışta sual işareti astında edi. Yaqın vaqıtta kelecek beş yıl içün taşıyıcı belgilenecek, şimdiki zamanğa qadar ise muvaqqat nizam çalışa edi.
Lâkin, yerli cemaatçılarnıñ faal areketleri №57 marşrutını daa yarım yılğa uzattırmağa yardım etti.
Avdetniñ evel bildirgenine köre, Aqmescitte marşrut avtobuslarında bilet fiyatlarınıñ idare etilmegen tarifi işke tüşürilecek.