Qırım yalısı yanında türkiyeli gemi saylıqqa oturdı

13.03.201710:27

Mart 12-de saba Qırım yalısı yanında Alupka (Büyük Yalta) rayonında Mikroneziya bayrağınen ketken RIVER EREGLI kiçik quru yük gemisi (koster) saylıqqa oturdı.

BSNews neşriniñ malümatına binaen, vaqia yelsiz ava olğanda yüz berdi, bu ise geminiñ motorı bozulğanını tahmin etmek etmek içün sebep bere. Lâkin, belki de, gemi 2016 senesi noyabr ayınıñ soñundan başlap AİS bildirici aletini qullanmağan edi.

Soñki belli olğan bulunma yeri – Keriç boğazı oldı, 30.11.16. Böyle şeylerni sıq-sıq kontrabandanı taşığan gemiler yapa.

2015 senesi avgust ayında gemi Qara deñizdeki Eregli şeerinden türkiyeli şirket tarafından satın alındı. AİS işareti ğayıp olğan 2016 senesi noyabr ayınıñ soñuna qadar quru yük taşığan gemi, özen klassına ait olğanına baqmadan, Qara deñizde yürgen edi.

Avdetniñ evel bildirgenine köre, Türkiyede Qırımdan kelgen gemiler qabul etilmey. Hususan, Aqyardan (Sevastopol) kelgen türkiyeli paromlarğa Zonguldak limanında iskelege yanaşmaq içün ruhset berilmey.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция AVDET

Редакция AVDET