Aqyar-Aqmescit yolunıñ bir qısmı topraq tayması neticesinde bozula

15.03.201715:05

Aqmescit-Bağçasaray-Aqyar yolunıñ bir qısmında Aqyar (Sevastopol) yönelişinde (Belbek (Fruktovoye) köyünden Mekenzi dağlarına yoquş) mart 9-dan mart 15-ke saat 18:00-ge qadar naqliye areketi sıñırlandı.

Topraq tayması neticesinde bozulğan yolda keçüv havflıdır. Aqyar akimiyeti acele tamir işlerini teşkil ete.

Şimdiki vaqıtta yolnıñ bu qısmında Aqyar yönelişinde naqliye areketi yasaqlanğan, şeerden ise, bir yolaqta areket etile.

«Eñ yaqın vaqıtta teşkerüv işleri alıp barılacaq, araçıqlar açılacaq, topraq tayğan geologik qatlam belgilenecek», – dep añlattı naqliye bölügi müdiriniñ birinci muavini Yevgeniy İsakov. O qayd etti ki, teşkerüv işlerinden soñ yapılacaq işlerniñ planı ve tüzetme çalışmalar belgilenecek.

Bunen beraber, içtimaiy ağlar qullanıcıları bildire ki, yolnıñ bu qısmında ne tamir yapqan işçiler, ne de nasıldır tehnika körünmey.

«İşte, bu Belbek – Aqyar yolu. Saat 10:45-te. İç bir işler alıp barılmay, iç bir insan yoq. Tınçlıq. Demek ki, bu iş uzaq sürecektir», – dep yazdı Vkontakte ağınıñ qullanıcılarınıñ biri.

Aydayıcılarğa ziyaretlerni evelden planlaştırmağa, diqqatlı olmağa, yol işaretleri ve qaidelerini kütmege rica etile.

Aylançıq yollar marşrutları:

1) Belbek –  Lübimovka –  Bogdanova soqağı;

2) Aqmescit-Bağçasaray-Aqyar yolunıñ 54-ci kilometrinde Povorotnoye köyü içinden keçken yolğa keçüv – yolğa 56-ci kilometrde Aqyar yönelişinde çıqış;

3) Belbek –  Lübimovka – Mekenzi dağları.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

оползень1

оползень2

оползень3

Author: Редакция AVDET

Редакция AVDET