Yuliya Samoylovanıñ Ukrainağa kirişi yasaq etildi

23.03.20179:29

Ukraina Havfsızlıq hızmeti (UHH) Rusiyeden «Eurovision-2017» yarışınıñ iştirakçisi Yuliya Samoylovanıñ devletke 3 yıl müddeti devamında devletke kirişini yasaq etti.

Lâkin, rusiyeli kütleviy haber vastalarınıñ malümatına binaen, yırcı Yuliya Samoylova Rusiyeni «Eurovision» yarışında 2018 senesi temsil etecek.

Bu aqta Ukraina Havfsızlıq hızmetiniñ matbuat kâtibi Yelena Gitlânskaya Facebook saifesinde bildirdi.

Qarar Samoylovanıñ Ukraina qanunlarını bozğanı aqqında malümatqa esaslanıp alındı.

Yırcınıñ Ukrainağa kirmek içün aqqı yoq, çünki o, Ukraina Nazirler kabinetiniñ 2015 senesi iyün 4-te qabul etilgen №367 qararını bozdı, bu qararğa binaen, ecnebiy şahıslarnıñ Qırım territoriyasına kirmek içün mahsus ruhsetnameleri olmaq kerek.

Bundan evel UHH-de bildirdiler ki, Samoylovanıñ meselesi boyunca qarar eñ yaqın vaqıtta qabul etilecek.

Avdetniñ evel bildirgenine köre, avropalı konkursta Ukrainanı «O.Torvald» rok gruppası «Time» yırınen temsil etecek.

Hatırlatamız ki, Kiyev, 2016 senesi Stokgolm şeerinde Jamala ğalebe qazanğan soñ, «Eurovision-2017» yarışını keçirmek aqqını aldı. Yarış finalı mayıs 13-te keçirilecektir.

Mart 13-te Avropa birligi Şurası Ukraina topraq bütünligi ve mustaqilligini bozuvnen bağlı kirsetilgen sanktsiyalarnı daa yarım yılğa uzattırdı. Bu müddet 2017 senesi sentâbr 15-ke qadar devam etecek.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция AVDET

Редакция AVDET