«Jamala.UА» vesiqalı filminiñ taqdiminde Jamala qırımtatar yırını yırladı

07.04.201712:30

Aprel 6-da «Jamala.UА» vesiqalı filminiñ gala-taqdimi keçirildi. Taqdimden evel Jamala qırımtatar tilinde «Unutmasañ» türküni icra etti.

Jamalanıñ sözlerine köre, o, onıñ aqqında endi vesiqalı film çıqarılğanından biraz utana, onıñ fikrince, bu kino erte yapılğandır.

«İç bir insan özüne soñuna qadar qıymet kesip olamay, men özümni pek aşağan insanım, men talapkârım, men perfektsionistim, men daima özümni inkişaf etmek içün çalışmağa isteyim ve men ne çıqışlarımdan, ne de muzıkamdan iç bir vaqıt soñuna qadar memnün olmayım. Menim aqqında vesiqalı film bar olğanından pek utanam, çünki, menimce, bu daa pek ertedir. Men yolumnıñ başında turam, muzıkam vastasınen daa çoq şey añlatmağa isteyim», – dep ayttı Jamala.

Film, yırcınıñ tabiatı, onıñ icadiy taqım ve mühbirler ile munasebetlerini köstere, yarışqa azırlanuv cedveli, körüşüvler aqqında añlata.

Film prodüseri Oleg Fialkonıñ haber etkenine köre, kino çıqarılması içün adını bildirmege istemegen alman yatırımcı para berdi. Prodüserniñ sözlerine binaen, bu adam Ukrainanı pek seve, amma ne içün bu film içün hususan bu qaraman saylanılğanını başta añlamağan edi.

«Biz oña (yatırımcığa, – Avdet) ayttıq ki, Jamala «Eurovision» yarışınıñ tek ukrain basamağında degil de, bu yarışnıñ ğalibi olacaq. Oña añlatqan edik ki, o, muvafaqiyetli qadın ola, o, davalarda körünmegen adam, ayat qıyınlıqlarından ise namus ile keçe… Ve biz çıqarıp başladıq», – dep ayttı prodüser.

Avdetniñ evel bildirgenine köre, gala-premyeradan soñ, film Ukrainanıñ 30 kinoteatrinde taqdim etilecek. «Jamala.UA», Dovjenko-Merkezi ve Ukraina Devlet kinosınıñ desteginen, milliy oynatımğa aprel 13-te çıqacaq.

Aleksandr Dovjenko milliy merkezi matbuat hızmetiniñ haber etkenine binaen, film mustaqil rejissör Anna Akuleviçniñ tarafından, Jamalanıñ razılığınen, amma onıñ kontroli olmadan, çıqarıldı.

Foto: Qırım.Aqiqat

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция AVDET

Редакция AVDET