Aqmescit Merkez bazarı yanında kene de politsiya maşnaları körüne

11.04.201711:35

Bugün saba Aqmescit (Simferopol) Merkez bazarı yanında yaqalanğan kişilerni taşığan mahsus politsiya maşnaları köründi. Avdet fotoresimlerni şaatlardan aldı.

Yaqalavlar aqqında bildirilmey, şaatlar ayta ki, politsiya maşnaları bu yerge öz alış-veriş noqtalarını öz küçünen yıqmağa istemegen qanunsız ticariy obyektlerniñ saipleri içün keldi. Bazarda buldozerler çalışa, ticariy noqtalarnı yıqa. Aynı vaqıtta bazar çalışmay.

Avdetniñ evel bildirgenine köre, Qırım paytahtı memuriyeti Aqmescit Merkez bazarında ticariy «noqtalarınıñ» saiplerini, göñülli olaraq, qayd etilgen qaide bozuvlarınıñ tüzetilmesi çerçivesinde bu alış-veriş noqtalarını yoq etmege mecbur etti. Şeer akimiyeti haber etti ki, yerli ükümetnen işbirlik tutqan iş adamları bir sıra yatırım leyhalarınıñ ömürge keçirilmesinde iştirak etmek aqqını alacaq. Merkez bazarında qanunsız çalışqan ticariy obyektlerniñ yoq etilüvi noyabr 8-de başlandı. Şeer akimiyeti ticaret pavilyonları bulunğan yerde çimen yapacaq ola.

Avdetniñ bildirgenine köre, aprel 6-da saba Aqmescit (Simferopol) merkez bazarını uquq qoruyıcılar sarıp aldı. Umumen olaraq, uquq qoruyıcılar tahminen 80 adamnı yaqaladı. Bazı malümatlarğa binaen, yaqalanğanlar arasında yaqında Ekstremizmge qarşılıq merkezine tüşken mühbir Taras İbragimov, bunen beraber, uquq qoruyıcı Andrey Krisko da oldı.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция AVDET

Редакция AVDET