Keçken afta soñu bütün gece devamında coyulğan ösmür qıdırıldı

11.04.201716:30

Keçken afta soñu Aqyar (Sevastopol) civarıdaki Baydar vadiysinde Urkusta köyünde 12 yaşıdaki Ayder adlı oğlan coyuldı. Onı lâqayt qalmağan vatandaşlar qıdırıp başladı.

Qıdıruv iştirakçileriniñ biri Nariman Memedeminovnıñ Avdetke bildirgenine köre, aprel 8-de aqşam ösmür anasınıñ ricasınen (suv almaq ya da tozyutarnı temizlemek içün) azbarğa çıqtı ve coyuldı. Anası birden babasına haber etti, o ise, işte edi. Aqay qomşu ve dostlarına barıp çıqıp, oğlunı tapalmadı.

Bundan soñ oğlan coyulğanı aqqında malümat içtimaiy ağlarda tarqatıldı. Böyleliknen oğlan coyulğanı aqqında subetdeşimiz Nariman Memedeminov da haberdar oldı. Qıdıruvğa on adam toplaştı, olar civarlarnı baqıp çıqtı, yerli göl yanında oğlannı qıdırdı. Ayderni bütün gece devamında qıdırdılar, amma tapmadılar.

Neticede oğlan özü keldi. O, bütün aqşam ve gece devamında köyniñ boş evleriniñ birinde bulundı, saba bitasına keldi. Oğlannıñ özüni böyle alıp barğanınıñ sebebi belli degil. Lâkin, yerli sakinler ayta ki, Ayderniñ qorantası yahşı, oğlan da pek terbiyeli, ve iç bir vaqıt ana-babasından razılıq almayıp evden ketmegen edi.

Avdetniñ evel bildirgenine köre, aprel 7-de Yedi Quyu (Lenino) rayonında dört yaşındaki qız ormanda coyuldı. Qız vaqia yüz bergen yerinden 2 kilometr uzaqlığında tapıldı. Bala, büyük mesafeni keçip, bir evçik yanında yuqlap qaldı. O yerde onı politsiya hadimi taptı.

Mart 4-te Qarasuvbazar (Belogorsk) rayonınıñ Köktaş (Sinekamenka) köyü yanında ormanda 3 yaşındaki Ablâkim Ablâkimov coyuldı. Oğlannı bütün köy sakinleri qıdıra edi, qıdıruvğa yarımadanıñ çeşit köşelerinden kelgen qırımtatarlar qoşuldı. Ablâkim tahminen 17 saat devamında ormanda bulundı, onı saba saat 5-te evinden bir qaç kilometr uzaqlığında taptılar. Bala Qarasuvbazar merkez rayon hastahanesine umumiy aşırı suvutma diagnozı ile ketirildi.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция AVDET

Редакция AVDET