FSB Sankt-Peterburg metrosında yüz bergen patlavnı teşkil etkeninen şeklenilgen kişini yaqaladı

17.04.201720:45

Rusiye Federal havfsızlıq hızmeti Sankt-Peterburg şeerindeki metroda yüz bergen teraktnı teşkil etkeninen şeklenilgen adamnıñ yaqalanuvını köstergen videonı kütleviy haber vastalarına teslim etti.

Bu aqta RBK haber ete.

Videoda körüne ki, urbalarında «FSB» işareti olğan adamlar avtomobilden çıqıp, yolda aqay kişiniñ artından çalılar arasında çapa. Nevbetteki kadrlar yerde yatqan aqay kişini köstere. Kadr artından kelgen «Soyadıñız, adıñız ne?» sualine aqay kişi böyle cevap bere: «Azimov, Abror».

Bundan soñ ondan soraylar: «Ne içün yaqalanğanıñıznı añlaysıñızmı?». Şeklenilgen insan «Elbet», dep cevap berdi. Tintüv vaqtında yaqalanğan kişide pıştav ve bir qaç patron, bunen beraber, cep telefonı ile paket tapıla.

Avdetniñ evel bildirgenine köre, aprel 3-te, tahminen saat 14:40-ta Sankt-Peterburg şeerindeki «Tehnologiçeskiy institut» ve «Sennaya ploşad» metro stantsiyaları arasında trende belli olmağan patlatıcı alet patladı. Neticede ondan ziyade adam elâk oldı. Taqiqat vaqianıñ esas versiya olaraq terakt olğanını ayta.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция AVDET

Редакция AVDET