Qırım mahkemesi «Hizb ut-Tahrir» işi boyunca Yaltada yaqalanğan kişini apiste qaldırdı

21.04.20179:20

Qırım Yuqarı mahkemesi aprel 20-de «Hizb ut-Tahrir» işi boyunca Yaltada yaqalanğan Arsen Cepparovnıñ apiste bulunma müddetiniñ uzattırılmasına qarşı onıñ ve imayesiniñ şikâyet arizasını qanaatlendirmedi.

Bu aqta toplaşuvdan soñ Cepparovnıñ adliyecisi Cemil Temişev bildirdi.

«Mahkeme kene de şikâyet arizalarımıznı qanaatlendirmedi. Bu apiste bulunma müddetiniñ devam ettirilüvleri imaye etkenim Arsen Cepparovğa, o, taqiqatqa kerek olğan deliller ketirsin dep, basım şekli olğanını endi aytqan edik», – dep ayttı Temişev.

Qızıltaş (Krasnokamenka) köyüniñ sakinleri Refat Alimov ve Arsen Cepparov 2016 senesi aprel 18-de yaqalandı. Olar, Rusiye Federatsiyası Cinaiy kodeksiniñ 205.5 maddesi 2-ci qısmı boyunca (Rusiyede terroristik tanılğan teşkilâtnıñ faaliyetinde iştirak etüv) qabaatlana.

Avdetniñ bildirgenine köre, «Hizb ut-Tahrir» işi boyunca yaqalanğan, davaları daa devam etken qırımtatarlar, mahkeme daa qarar çıqarmağanına baqmadan, terrorist ve ekstremistler cedveline kirsetildi.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция AVDET

Редакция AVDET