Belli ukrain alıp barıcıları Jamalanıñ toyunda qırımtatar adetleri boyunca oynadı (VİDEO)

30.04.201710:11

İçtimaiy ağlarda aynıñ eñ çoq laf etilgen Jamalanıñ toyundan tafsilâtlı malümat peyda olmağa devam ete. Merasim musafirleri tarafından paylaşılğan videolar qırımtatarlarnı quvandıra, çünki olar milliy adetlerni köstere – kiyevniñ ana-babası tarafından Quran «satın aluv» ve, elbet, milliy adet boyunca oyunlar.

Mına, meselâ, belli ukrain alıp barıcısı ve aktör Vasilisa Frolova Jamala ve Seit-Bekir ile oynanağa çıqtı, o, tap qanında qırımtatar tamırları bar olğanını tüşündi.

Olarnen beraber zenaatdaşı Karolina Aşion da oynadı.

Bu yerde ise, «Ukrainskaya pravda» baş muarriri Sevgil Musayeva, «KrımSOS» teşkilâtınıñ tesisçileri ve qırımtatar faalleri Alim Aliyev ve Tamila Taşeva oynaylar.

Qayd etmek kerek ki, Jamalanıñ toyunda belli «Hayat» ansambli muzıkanı çaldı.


Kelin-kiyevnen oynamağa Qırımdan kelgen musafir, belli qırımtatar bestekârı, yırcı, «Qırım» ansambliniñ reberi Server Kakuranıñ qızı Elvina Kakura da çıqtı.

Merasim alıp barıcısı Suleyman Umerovnıñ içtimaiy ağlarda paylaşqan videosına köre, Jamala ve Seit-Bekirniñ toyunda Quran aluv adeti de ömürge keçirildi. Kiyevniñ ana-babasına Muqaddes Kitapnı kelinniñ doğmuş torunı (tarası Evelinanıñ qızı) «satıp berdi». Bundan soñ, banket zalına kirgen kelin ve kiyevni oyunlarnen qarşıladılar.

Jamala ve Seit-Bekir Suleymanovnıñ toyundan fotoreportajnı bu bağlantı vastasınen körmek mümkün.

Avdetniñ evel bildirgenine köre, aprel 26-da «Eurovision-2016» yarışınıñ ğalibi Jamala Seit-Bekir Suleymanovğa aqayğa çıqtı.

Jamala ve Seit-Bekirniñ arasındaki munasebetler aqqında 2016 senesi sentâbr ayında belli oldı, o vaqıt Susanna Camaladinova qısqa film Manhetten festivaline güzel yigitnen beraber keldi. Olar, Kiyevde keçirilgen qırımtatar merasimleriniñ birinde tanış oldı ve endi eki yıldan berli körüşeler. Yırcınıñ evel aytqanına köre, hususan Seit-Bekir onı «Eurovision» yarışında iştirak etmege çağırdı. «Sen ğalebe qazanırsıñ, çünki buña lâyıqsıñ», – dep paylaştı Jamala.

Seit-Bekir Suleymanov qırımtatar milliy areketi faali Sinaver Kadırovnıñ oğlu ola. O, Aqmescitte doğdı, Şevçenko adına Kiyev milliy universitetinde tibbiy radiofizika bölügini ve Kiyev iqtisadiyat mektebini bitirdi. Bunen beraber, o, cemaat erbabı ola.

Bundan evel Jamala añlattı ki, olarnıñ Seit-Bekir Suleymanov ile toyu Kiyevde yapılacaq, amma böyle merasim içün eñ güzel yer Qırım olur edi.

İçtimaiy ağlarda Facebook,Vkontakte,Odnoklassniki saifelerimizge, bunen beraber,Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция AVDET

Редакция AVDET