Tintüvden soñ yaqalanğan qırımtatar kişi Krasnodar ülkesine alıp ketirildi

09.05.201712:25

Sudaq civarındaki Qapsihor (Morskoye) köyünde evinde mayıs 8-de tintüv keçirilgen Yusuf Toroznıñ oğlu Serverni uquq qoruyıcılar Krasnodar ülkesine yollay.

Qırımtatar faali Lenora Dülberniñ malümatına binaen, o yerde gençke nisbeten cinaiy iş açıldı.

«Bütün malümat adliyecilerge berildi – olar meseleni ögrenecek ve protokolğa qarşı şikâyet etecek. Belli olğanına köre, onıñ ana-babası birden politsiya bölügine bardı, o yerde kimse yüz bergen vaqia aqqında haberdar degil edi. Neticede Krasnodar ülkesinen telefon vastasınen bağlanıp, bildiler ki, adam o yerge alıp ketirildi», – dep ayttı faal «Qırım.Aqiqat»qa bergen izaatında.

Ev saibiniñ sözlerine köre, tintüv sebebi, sanki narkotiklerniñ işlep çıqarılması oldı. Tintüv keçirilgen vaqıtta uquq qoruyıcılar bu yerden bir şey almadı.

Avdetniñ bildirgenine köre, mayıs 8-de Qapsihor (Morskoye) köyü sakini Yusuf Toroznıñ evinde tintüv keçirildi. Bu köyniñ qırımtatarlar toplu yaşağan qasabanı silâlı uquq qoruyıcılar sarıp aldı. Bundan evel Sudaq rayonındaki Qapsihor (Morskoye) ve Qutlaq (Veseloye) köylerinde politsiya hadimleri qırımtatar evlerinde reyd keçirdi. Bundan da ğayrı, anonim mektüp boyunca qırımtatar milliy areketi faali İlver Ametovnıñ evinde de tintüv keçirildi. O yerde uquq qoruyıcılar silâ ve narkotik qıdırdı. Ametovnıñ oğlu tintüv keçirilgen soñ Aqmescitke (Simferopol) alıp ketirildi, lâkin soñra azat etildi.

İçtimaiy ağlarda Facebook, Vkontakte,Odnoklassniki saifelerimizge, bunen beraber,Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция AVDET

Редакция AVDET