Ukraina Qırım sakinlerine biometrik pasportlarnı bermeli – Avropa Birligi elçisi

10.06.201711:30

Avropa Birligi elçisi Hüg Mingarelli ilân etti ki, vizasız nizam Ukrainanıñ bütün vatandaşları içün çalışmalı.

Avropa Birligi Qırım sakinleri içün eski şekilde tış pasportlarınıñ kirsetilüvi aqqında Ukraina prezidenti Petro Poroşenkonıñ bildirgen fikrini kontrproduktiv olğanını saya.

Bu aqta «Yevropeyskaya pravda», Avropa Birligi elçisi Hüg Mingarelliniñ sözlerine esaslanıp, bildire.

«Men qayd ettim ki, laf bütün ukrainler aqqında kete, çünki Ukrainanıñ ayrı resmiy şahısları teklif etken edi ki, Qırım ve Donetsk ve Lugansk vilâyetleri sakinlerine vizasız rejim içün kerek olğan pasportlar berilmesin. Bu, Avropa Birliginiñ noqta-i nazarına zıt kele. Qayd etmek isteyim ki, Avropa Birligini vizasız ziyaret etmek aqqını Ukrainanıñ bütün vatandaşları, olarnıñ qayda yaşağanına baqmadan, almalı», – dep ayttı AB elçisi.

Avdetniñ evel bildirgenine köre, Ukraina vatandaşları olğan Qırım sakinleriniñ de Avropağa vizasız barmağa imkânı olur. Bunıñ yekâne şartı şu ki, ukrain ükümeti organları tarafından berilgen biometrik pasport olması kerek.

Aprel 6-da, Avropa parlamenti deputatları Strasburgda keçirilgen umumiy toplaşuvda Ukraina vatandaşlarına qısqa müddetke Avropa birligi devletlerine vizasız kiriş aqqını bergen qanun leyhası içün rey berdi. Avropa Birligi Nazirler Şurası mayıs 11-de Ukrainağa vizasız nizam berilmesi aqqında qararnı taqdirledi.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция AVDET

Редакция AVDET