Kergin ava vaziyetinden sebep 9 biñ Qırım sakini yarıqsız qaldı

24.06.201717:32

Ava vaziyeti kerginleşkeni (küçlü yel) sebebinden Qırımnıñ 9 meskün yerinde elektrikanen teminlev toqtatıldı. Umumen olaraq, 9458 adam yarıqsız qaldı.

Bu aqta Rusiye Fevqulade vaziyetler nazirligi Qırım Cumhuriyeti boyunca Baş idaresiniñ matbuat hızmeti bildire.

Müessisede qayd eteler ki, fevqulade ava vaziyetiniñ aqibetlerini tüzetmek içün rayon elektrik stantsiyalarınıñ 15 taqımı, 53 adam ve 20 tehnika çalışa.

Qırım gidrometeorologiya merkeziniñ malümatına köre, yarımadanıñ bazı rayonlarında şiddetli sağanaqlar, boranlı yağmur ve burçaq yağacaq, saniyede 20-25 metr suratınen yel esecek.

«Krımenergo» müessisesiniñ bildirgenine köre, yarımadada furtunalı ava neticesinde elektrik ağları bozula bile.

İçtimaiy ağlarda FacebookVkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция AVDET

Редакция AVDET