Qırımda «Çiygoznıñ işi» boyunca mahkemede Zaur Smirnov izaat bere

27.06.201711:55

Bugün, Qırım Yuqarı mahkemesine Ahtem Çiygoznıñ işi boyunca toplaşuvğa yarımada milletlerara munasebetler ve sürgün etilgen vatandaşlarnıñ meseleleri boyunca Devlet komitetiniñ yolbaşçısı Zaur Smirnov keldi.

Bu aqta «Qırım.Aqiqat» bildire.

Smirnov şaat olaraq izaat bere, şimdiki vaqıtta o, sorğuğa çekile.

Toplaşuv keçirilgen vaqıtta adliyeci Nikolay Polozov Qırım parlamenti spikeri Vladimir Konstantinovnıñ mahkemede sorğuğa çekilmesi aqqında şefaat arizasını berdi.

«Konstantinov – fevral 26-da deputatlarnıñ qayd etilmesi, olarnıñ kelmelerinen bağlı vaziyetni añlata bilgen yekâne şahıstır. Biz üç deputatnı sorğuğa çektik, ve olardan iç biri sessiyağa miting sebebinden kirip olamağanını aytmadı. Konstantinov bütün bularnı añlata bile», – dep ayttı Polozov.

Mahküm etilgen Ahtem Çiygoz şefaat arizasına qol tuttı.

«Men qol tutam, ve, fikrimce, bu lâzimdir, çünki deputatlar Kovitidi ve Tsekov biri birine, reglamentke zıt kelgen şeyler ayta. Bunı, Konstantinovnıñ sorğuğa çekilmesinen çezmek mümkün», – dep qayd etti o.

Prokuror Konstantinovnıñ sorğuğa çekilmesine qarşı çıqtı, amma mahkeme oña qol tutmadı ve Konstantinov dava ceryanında iştirak etmek kerek, dep qarar aldı.

Avdetniñ evel bildirgenine köre, iyün 27-de Qırım Yuqarı mahkemesi qırımtatar faali Ahtem Çiygoz imayesiniñ yarımada müftisi Emirali Ablayevni sorğuğa çekmek muracaatını red etti.

İçtimaiy ağlarda FacebookVkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция AVDET

Редакция AVDET