Qırımtatar bala merkezinde kene de teşkerüv keçirildi

30.06.201717:10

Canköydeki Elif bala merkezinde Rusiye Federatsiyası federal qanunlarına riayet etüvnen bağlı prokuror teşkerüvi keçirildi.

Bu aqta merkez reberi Lutfiye Zudiyeva bildirdi.

Onıñ malümatına köre, teşkerüv keçirgen eyyetniñ terkibine prokurornıñ üyken yardımcısı, politsiya hadimi, Rospotrebnadzor temsilcisi, tasil bölügi temsilcileri, Fevqulade vaziyetler nazirliginiñ hadimi kirdiler.

«Yanımızda olıp, iç vesiqalar tizilmedi, teşkerüv aqqında qarardan ğayrı, iç başqa vesiqalarnı imzalamadım. Teşkerüv neticelerinen tanış olmaq içün prokuraturağa davetni bekleyim», – dep añlattı o.

Hatırlatamız ki, yanvar 27-de Canköydeki «Elif» qırımtatar bala merkezinde tintüv keçirildi. O vaqıt merkez hadimleri sorğuğa çekildi. Bala merkezi müdiresi Lutfiye Zudiyevanıñ sözlerine köre, suallerniñ çoqusı dinnen bağlı edi. Bir qaç aftadan soñ merkezde kene de tintüv keçirildi. Canköydeki Elif bala merkezinde keçirilgen tintüv neticesinde (vesiqalarda qayd etilgenine köre) alınğan kitaplar müessise müdiresi Lutfiye Zudiyevağa yarım yıl keçken soñ qaytarıldı. Qadınnıñ malümatına köre, onıñ taqiqat komitetine etken şikâyetlerine cevap olaraq oña bildirildi ki, kitaplar Saratov şeerine psihologik-lingvistik ekspertizağa yollanılğan edi.

İçtimaiy ağlarda FacebookVkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция AVDET

Редакция AVDET