Aliye Bekirova «Çernomorskiye igrı» festivaliniñ ğalibi oldı

07.08.201712:30

Hersonnıñ (Ali-Agok) (Skadovsk) şeerinde olıp keçken XV yüldönüm Bütün Ukraina «Çernomorskiye igrı» hayrıye bala festivaliniñ ğalibi İlsâm-Terek (Kirovskoye) sakini Aliye Bekirova oldı.

  Ğalebeni oña «Dohtur» yırı ketirdi.

Festivalde Aliyeden ğayrı Qırım adından «Canlı ses» istidatlı ballar şousınıñ finalistleri Emiliya Kurtseitova ve Server Karabayev bulundılar. Olar konkursta qırımtatar yırlarını icra ettiler.

Bütün ülkeden eñ yahşı yırcı unvanı içün elli bala küreşti. Jüride şou-bizness yıldızları, prodüsser, muzıka tenqitçileri bar edi.

Festivalniñ esas yarışı 368 iştirakçi qayd etilgen yır konkursı oldı. Eki seçme turından soñ yarıfinalğa 57 yırcı ve vokal taqım keçti.

Aliye Bekirova ukrain seyircisini 2015 senesinde  «Golos. Ditı» («Ses. Ballar») leyhasında qazandı. O, Qırımnıñ «Tatlı ses» istidatlı ballar şousınıñ finalisti, «Parad solıstov» («Yırcılar paradı») yarışınıñ ğalibi, 2010 s. – 1 yer, «Radugi Kimmerii» («Kimmeriyanıñ Kök quşaqları»), 2013 s. – 1 yer; «Altın ses», 2013 s. – 1 yer; «Artek obyedinyayet druzey» («Artek dostlarnı birleştire»), 2013 s. – laureat; «Spivogray», 2013 s. – 2 yer; «İlsâm-Terek istidatları», 2013 s. – 1 yer; «Solhat Minareleri», 2013 s. – 2 yer; «Zori Aluştı» («Aluşta tañları»), 2013 s. – 1 yer; «Кrımskiye volnı» («Qırım dalğaları»), 2014 s. – 1 yer.

 

İçtimaiy ağlarda FacebookVkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция AVDET

Редакция AVDET