Yaltada yarım tonnadan ziyade yabancı qaşqaval ve kolbaslarnı yaqtılar

09.08.201710:10

Rusiye köy hocalığı nezareti idaresiniñ Qırım mütehassısları Yaltada Rusiyege ketirmege yasaq olğan yarım tonnadan ziyade yabancı qaşqaval ve kolbas mahsulatını taptılar.

Bu aqta idareniñ matbuat hızmeti haber ete.

«Devlet teftişçileri satılıqta 488,8 kg Almaniya, Gollandiya, Ukraina, Frenkistan, Danimarka memleketleri yapqan qaşqavallarnı meydanğa çıqardılar. Olarnıñ arasında maasdam, dorblü, kamamber, bri ve başqa çeşitleri bar edi. Aynı vaqıtta, Harkov et kombinatınıñ 50,1 kg kolbas mahsulatı da meydanğa çıqarıldı», – dep aytılğan idareniñ haberinde.

Qayd etile ki, anbar-tükânınıñ saipleri mütehassıslarğa mahsulatnıñ keyfiyet ve telükesizligini isbatlağan veterinar sertifikatlarını ve başqa vesiqalarnı berip olamadılar. Qaşqaval ve kolbaslar alınıp, «Brener 1000» sobasında yaqıldılar.

İçtimaiy ağlarda FacebookVkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция AVDET

Редакция AVDET