Bir afta içinde Qırımda 300-ge yaqın yanğın söndürdiler

12.08.201718:03

Bir afta içinde Qırımda 300-ge yaqın yanğın söndürdiler

Keçken afta içinde Qırım Cumhuriyetiniñ Federal yanğınğa qarşı hızmetiniñ bölük küçlerinen yarımadanıñ açıq yerlerinde  279 yanğın yoq etilgen edi. Pek sıcaq ava sebebinden Qırımnıñ çoq regionlarında yanğın telükesiniñ seviyesi eñ yüksek beşinci sınıfqa çıqtı.

Bu vaqıt içinde yanğınlardan eñ çoq yarımadanıñ çoq insan yerleştirilgen yerleri ve munitsıpal quruvları zarar kördi. Olarnıñ arasında: Keriç, Aqmescit (Simferopol), Kefe (Feodosiya) şeerleri, Yedi-Quyu (Leninskiy), Saq ve Aqmescit (Simferopol) rayonları.

Açıq yerlerde yanğın başlamanıñ eñ yayğın sebebi – vatandaşar tarafından yanğın telükesizligi qanunlarına diqqat etmemeleri, yanğınnen muqayt olmayıp, muamele etüvleri, yani insaniy faktor, – dep haber ete Fevqulade vaziyetleri nazirliginiñ matbuat hızmeti.

Aqşam, 11 avgust künü, Qarasubazar (Belogorsk) rayonında büyük yanğın oldı. Azamat (Malinovka) köyü etrafında quru ot yanmağa başladı. Yanğın 70 gektar qadar tarqalğan, amma Azamat ve Kolpak (Hlebnoye) köyleri zarar körmediler. Yanğın söndürüvde MÇS vertolyoti Mİ-8 iştirak etti. 9 kere suv tökip, o, 45 tonna suvnı masraf etti.

Avdet haber etkenine köre, Sudaq etrafındaki dağ yanğını 50 gektarnı qaplap aldı. Onıñ söndürmesinde 486 insan ve 55 mahsus tehnika işletildi.

İçtimaiy ağlarda FacebookVkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция AVDET

Редакция AVDET