Aluşta plâjlarını kenef suvları bastı

23.08.201723:15

Aluştada kanalizatsiyanen olğan problemalar içün şeer plâjlarını ekskrementler bastı. Onıñ içün şeer akimiyeti eki künge fevqulade vaziyetini ilân etti.

Yerli sakinler ve turistler internette «deñiz pek kirli» olğanına şikâyet eteler. Adamlar, olarnıñ raatlanuvları bozulğanını aytalar.

«Temizleme yapıları furtuna sebebinden bozuldı. Vaziyet, kerçektende ağır, tamirat vaqtına şeerni suvnen temin etmek de ağır oldı. Şimdi olğan problemelar çezildi, eki nasos qoyıldı», – dep bildirdi şeer başınıñ muavini Aleksey Boyarçuk.

Aluşta şeeri, ende çoqtan, kanalizatsiya ve temizleme yapıları ile problemaları olğan Qırım şeerleri sırasına kirmekte. Ekolog Dmitriy Tihonov bildirgenine köre, kanalizatsiya aqıntıları Aluştanıñ üç büyük plâjında da – Şarqiy yalı kenarında, merkezde ve Professorskiy ugolokta bardır, dep haber ete «Primeçaniya».

Bu kibi meseleler şeerde, birinci keresi olmay. Meselâ, 2016 yılınıñ avgust ayında kanalizatsiya aqıntıları mesken evni ve Riviera Sunrise oteliniñ plâjını bastı. 2012 senesiniñ mayıs ayında, kanalizatsiya temizleme arabaları, ekskrementlerni Ulu – Üzen ozenine ketirip tökkenleri içün balaban qavğa köterilgen edi.

İçtimaiy ağlarda FacebookVkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция AVDET

Редакция AVDET