Uzaq memleketlerdeki Qurban bayram

30.08.201712:52

1400 yıl evelsi, Allahnıñ soñki peyğamberi Muhammed (aleyhusselâm), Qurban bayramnı musulmanlarnıñ eñ büyük bayramları, dep qayd etken edi. Qurban bayram, yada arapça İd Al-Adha, musulman halqlarınıñ eñ büyük bayramlarıdır. Onı Zu-l-hicca ayınıñ onuncı kününe qayd eteler, bayram çerçevesinde acılıq yapıla, Mina yerlerinde, İbrahim (a.s.) ve İsmail (a.s.) peyğamberleriniñ Allahqa qarşı köstergen itaatları ürmetine, qurbanlar kesile.

Mağribde qayd etilgen qurban bayram

Kim, meşur «Klon» adlı serialdan soñ Mağribke barmağa istemedi? Men bellesem, böyle adam pek az. Bir de İd-al-Babir künleri anda barsañız! Aynı böyle dep, Mağribde Qurban bayramğa aytalar.

Mağrib qırallığa – Afrika qırallıqlarınıñ eñ qadimiylerinden biri, dep sayıla. Araplar Mağribke Al-Mağrib, ya da Al-Mağrib al-Aksa deyler, tercimesine köre bu «uzaq Ğarbda yerleşken memleket» manasını añlata. Avropalılar, bu memleketke Marokko dep, onı «qırmızı», ya da «dülber» manalarında tercime eteler.

Mında da, bütün islâm dünyasında olğanı kibi, İd-al-Babir bayramını küneş doğuvından qayd etip başlaylar. Bütün musulmanlar dülber kiyinip, quşanıp camige, bayram namazına keteler. Rabat şeeriniñ sakinleri XII asırda qurulğan Hasan camisine, ya da XIV asırda yasatılğan Büyük  camige baralar. Namazlar bitken soñ, adamlar cami azbarında toplanıp, tekbirler oquylar. Sadaqalar bereler.

Soñra ise, mezarlıqlarğa barıp, ölüleriniñ ruhlarına dualar oquylar. Soñ ise, qurbanlar çalalar. Eñ meraqlı Mağrib adetlerrinden biri de, bu er bir merasimde muzıka çalınmasıdır. Qurban bayram künleri de buña istisna degil.

Saudiy Arabistanda Qurban bayram

Bayram künleri Saudiy Arabistanda balabandan – balaban yardımlaşma aktsiyası keçirile. Mında Mekke tübünde yerleşken «Al-Muaysam» meydanında 700 biñge qadar qoy ve on biñlerce deve ve sığırlar qurban ketirilip, fuqarelerge tarqatıla.

Qurbanlarnı 18 biñ etçi kese, olarnıñ yanında 730 veterinar ve 700 ilâhiyatçı buluna.

Qurban etilgen ayvanlarnıñ etleri buzlatılğan, ya da konservlengen şekilde, mahsus cedvelge köre 27 memleketniñ fuqare sakinlerine yollanıla.

1983 senesinden berli, bu proyekt böyünca 4 million ayvan qurban etilgendir.

Qurban bayram Mısırda

Mısırda, çoqu halqı arap olğanı sebebinden, Qurban bayram merasimlerini Mekkege aciliq yapılğan soñ qayd etip başlaylar. Qurbanlar kesilip, güzel – güzel yemekler pişirile, donatılğan sofralar, çoqusı vaqıt, yollarda qurula, bütün istekliler ziyafetke qoşula bileler.

Qurban güzel, baqılğan ayvanlardan kesile ve bu etler fuqare qorantalarğa darqatıla. Merametlik bayramı böleliknen yerine ketirile. Ayvanlar kesilmeden evel, molla duva oquy, ayvannı yerge yatqıza, başını Mekke tarafqa aylandıra ve «Bismillah, Allahu Ekber», dep boğazlay. Qurban etilgen ayvanlarnıñ terilerini, çoqusı vaqıt camilerge bereler. Etini pişireler ve birlik sofralarında aşaylar. Bayram devamında soy – soplarğa, yaqın – uzaq aqrabalarğa baralar. Bir rivayetlerge köre, Cennetke ketken yol Sırat köprüsinden keçecek, müminler içün bu köpür keñ ve doğru olacaq, günahkârlar içün ise, pek ince ve ağızdan keskin olacaq. Lâkin dünyada Qurban etilgen ayvanlar, Sırat köprüsiniñ başında turacaq ve kerek olsa sayibini cennet qapısına Sırattan alıp keçecek.

Qoşma Arap Emirliklerinde Qurban bayram

Bu pek genç ve bay memleket. O 1971 senesi, Basra körfezinden ingiltereliler ketken soñ peyda olğandır. Bu yılı Qurban bayramına mında temelli azırlanalar, 20 dekabrdan 1 yanvar kününe qadar raatlıq ilân etilip, bütün teşkilâtlar qapalı ediler. Ve şu künden Bayram merasimleri şeñ ve pek zevqlı keçirile.

İçtimaiy ağlarda FacebookVkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız. 

 

Author: Редакция AVDET

Редакция AVDET