Üç qırımtatarnı ekstremistik gruppası tizgenlerinde ve iştirak etkenlerinde qabaatlaylar

05.10.201712:48

Aqmescitniñ Kiyevskiy rayon mahkemesi üç qırımtatarnı – Renat Suleymanov, Arsen Kubedinov ve Talât Abdurahmanovlarnı apis etti.

Böyleliknen, olar apiste 29 noyabrge qadar olacaqlar.

Qırımlılarnıñ advokatları, olarnıñ qabaatları isbatlanmağanını aytıp, ev apisine almalarını, istediler, dep haber ete «QırımAqiqat».

Prokuror ise, öz sırasına apiske alma vesiqalarında, bu üç kişi «deşetli cinayet» işlediler dep, qayd etti.

Ondan evel belli olğanına köre, mahkeme, yaqalanğan Seyran Mustafayevnı, 29 noyabrge qadar ev apisine yolladı.

Hatırlatamız, 2 oktâbr künü, Aqmescitniñ Molodöjnoye qasabasında Renat Suleymanovnıñ evinde tintüv olıp keçti.

Kene şu künü, Qarasuvbazar (Belogorsk) rayonınıñ Terekli – Şeyh – Eli (Melniçnoye) köyünde 64 yaşlı Talât Abdurahmanov yaqalandı.

Bildirgenlerine köre, 2 oktâbr künü, Qırımda «Tabliği Camaat» adlı islâm teşkilâtınıñ üç gruppası yoq etildi.

«Tabliği Camaat» – siyasetke bağlı olmağan diniy teşkilât. O 1926 senesi İndistanda peyda oldı. Onıñ esasçısı dep, Moulana Muhammad İlyas degen adam tanıla. Bu teşkilâtnıñ esas ğayesi, insanlarnı müsülmanlıqnı qabul etmeleri ve olarğa içtimayi ve iqtısadiy statuslarına baqmadan adaletli davranmalarda bulunmalarıdır. 2009 senesi, Rusiyeniñ Yuqarı mahkemesi, bu teşkilâtnı ekstremistik, dep tanıdı ve yasaq etti.

İçtimaiy ağlarda FacebookVkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция AVDET

Редакция AVDET