Aluşta şeerinde bala hirurgı Girey Bairov adına skver peyda oldı

07.11.201720:51

Aluştada belli bala ekimi, hirurgı, professor, doğma Aluştalı Girey Aliyeviç Bairov adına skver açıldı. Bu sene, ulu hirurg 95 yaşını tolduracaq edi, skver açılması da şu künge bağışlanğandır.

Girey Bairov – sovet bala ekimi, hirurgı, tibbiyet ilimler doktorı, professor, Sovetler birligi tibbiyet ilimler Akademiyasınıñ korrespondent azası, Sankt – Peterburg tibbiyet akademiyasınıñ bala hirurgiyası kafedrasınıñ müdiri, Rusiye Federatsiyasında nam qazanğan ilimler erbabı, Leningradta birinci olaraq bala hirurgiyasınıñ esasçısı.

Girey Bairov – doğma Aluştalı. O, mektep ocası Ali Memetoviç Bairov ve onıñ qadını Lidiya İvanovna İgnatoviçniñ horantasında doğdı. G. Bairovnıñ bir qartbabası – Memet Bairov qaza ekimi edi, digeri ise, İvan İgnatoviç – Tibbiyet – hirurgiya Akademiyasınıñ mezunı edi, Opoçkede köy ve şeer ekimi olaraq çalışa edi.

сквер1

Mektepten soñ, birinci Moskva tibbiyet institutına oqumağa kirdi. Ulu Vatan cenkiniñ iştirakçısı. Cenkten soñ Leningrad bala hirurgı olıp çalıştı. Sürgünlikten soñ, Bairov qırımğa çoq kereler kele, amma vatanında yaşamağa oña izin bermeyler. 1959 senesi Leningrad tibbiyet institutınıñ hirurgiya ve ortopediya kafedrasınıñ müdiri olaraq saylanğan edi. Bala hirurgiyası boyunca bir qaç monografiyanıñ müellifidir. 1963 senesinden berli – tibbiyet ilimler doktorı. Professor, tibbiyet ilimleri akademiyasınıñ azası edi. Girey Bairov – Sovetler birligi Devlet mukâfatınıñ laureatı edi. 1989 senesi 6 iyül künü Moskva şeerinde vefat ete.

Girey Bairov öz talebelerinde, birinciden, vicdanlı ve ğararsız olmalarını istey edi, ustalıqqa ise, ögretmege vade ete edi.

Author: Редакция AVDET

Редакция AVDET