Elvida, Fikret ağa Yurter

05.05.20200:07

Yarım asır evel Amerika Qoşma Ştatlarında Qırımtatar medeniy birleşmeniñ reisi olaraq, mında Almaniyadan yaqında köçip kelgen yüksek ihtisaslı müendis, Qırımnıñ dünyaca diasporasında endi salmaqlı işlerinen belli, körümli şahıs olğan Fikret Yurter saylanğan edi.

Birleşmeniñ faaliyeti bayağı canlanıp, sesi ve meramı çeşit halqara meydançıqlarğa – AQŞ ve diger Ğarp memleketlerde ötkerilgen kongress, forumlarğa ve belli siyasetçilerge muracaatlar şeklinde yetkizilmege başlandı. Buña esasnı – 1970-inci seneleri halqara munasebetler yımşasa da, halqımıznıñ sürgünlikteki vaziyeti, Vatanğa qaytaruv meselesinde ep fenalaşıp kelmesi de bergen edi.

Tamam bu soy areketlerniñ daa da faalleştirilmesi maqsadınen Fikret Yurter, Mübeyin Altanlı, Memet Sevdiyar bir qaç diger safdaşlarınen beraber 1976 senesi Qırımtatar Milliy Merkezni quralar ve AQŞ-da, New-Yorktaki Birleşken Milletler binasınıñ qarşısında miting, piket, yürüşler ve diger narazılıq aktsiyalarnı teşkil eteler, nufuzlı siyasiy ve devlet erbaplarınen, şu cümleden, R. Reygan, C. Buş kibi Amerika prezidentlerinen körüşeler.

Muntazam sürette ötkerilgen bu tedbirlerniñ muqaddes maqsadı – Sovetler Birliginde qırımtatarlarnıñ ağır siyasiy vaziyetine dünya cemaatçılığınıñ diqqatını celp etmek, halqımıznıñ Vatanı – Qırımğa qaytarılması ve onıñ aq-uquqları tolusınen tiklenilmesi içün alıp barğan keskin küreşi aqqında bildirmek edi.

F. Yurter ve onıñ Merkezdeki meslekdeşleri Mustafa Cemilni qurtaruv komitetini teşkil eteler, sovet apishanelerde bulunğan Milliy areketimizniñ diger faal iştirakçileriniñ azat etilmesini talap eteler, P. Grigorenko, canını qurtarıp, AQŞ-ğa mecburiy alda kelgen soñ oña çoq yardım eteler. New-Yorkta Qırımtatar şeitler – 18-mayıs facia qurbanları abidesi tiklenmesiniñ teşebbüsçileri ve teşkilâtçıları oldılar.

Fikret ağanıñ yolbaşçılığındaki Merkezniñ semereli faaliyeti qırımtatarlarnıñ öz teşebbüsinen Vatanğa kütleviy avdeti başlanğanınen ve halqımıznıñ ekseriyeti Qırımda toplanğanınen toqtamadı. Yardım işleri, maneviy, uquqiy qoltutuv devam etti. Fikret ağa defalarca Qırımğa kelip, cemaatımıznen körüşti, qolundan kelgenini yapmağa tırıştı.

Er şey Yaratıcınıñ iradesi ve emiri sayesinde keçer eken, 1-mayısta New-Yorktan epimizni teren qayğığa bıraqqan kederli haber keldi: şu künniñ sabasında Fikret Yurter 88 yaşta bu faniy dünyanı terk etti. Milletimizge nisbeten adalet tiklenilmesi ve zengin tarihlı bir qadimiy halq olaraq ilerilemek imkânlarımız açılması oğrunda ömür boyu namus ve vicdan ile, aqiqiy vatanpervercesine hızmet etken safdaş ağamızdan ayırıldıq…

Fikret ağa 1932 senesi Suvdağ rayonı Ayserez köyünde yerli mektepniñ namlı ocası – Abdulla Aci Abibullanıñ qorantasında dünyağa keldi. Ekinci cian cenki vaqtında bu qoranta Türkiyege kete. Mında genç Fikret litseyni bitire. 1955 senesi o, Almaniyanıñ eñ künbatısında meşur Ahen şeeriniñ universitetine oqumağa kire ve andan müendis olıp çıqa. Cemaat işlerine kirişe, türk studentleri cemiyetini qura, onıñ yolbaşçısı ola.

Bir qaç yıl Almaniyada çalışıp ve ihtisasını quvetlendirip, F. Yurter Türkiyege qayta. Esas işinden ğayrı, o, şu, 1960-ıncı seneleri, qocaman sovetler devletiniñ, qırımtatarlar quvğunlıq yerlerinde ebediy yaşamaq şart degen emirine boysunmayıp, Qırım davasını alıp barğanları aqqında çoq yaza ve bu yazılarnı keniş darqata.

1970 senesi qırcıman yaşqa yetken Fikret bey Amerikağa köçe ve öz milliy faaliyetini mında yañı safdaşlar, yañı küç-quvet ile, yañı imkânlar şaraitinde devam ete. Otuz yıl devamında Qırımtatar medeniy birleşmesine yolbaşçılıq yapa. İstidatlı publitsist, o, emiyetli, aktual maqalelernen bir sırada, mündericesi teren ve tesirli, Vatan mevzusında şiirler yaza. Olar ayrı cıyıntıqta çıqmaqnen beraber, Qırımdaki milliy neşirlerde de derc oluna.

Fikret Abdulla oğlu Yurter er ceetten – cemaat erbabı ve teşkilâtçı, yazıcı-şair ve milliy ğaye teşviqatçısı sıfatında ciddiy, ferasetli, semereli seviyede işlerni alıp barıp, halqımıznıñ Vatanına qaytuvı ve doğmuş toprağında ğayrıdan tiklenmesine, milliy menfaatımız oğrunda devamlı ve keskin mevquriy küreşte öz degerli ve salmaqlı issesini qoştı. Bunıñnen o halqımıznıñ hatırasında ebediy yaşaycaq.

Fikret ağamız vefat etkeni munasebetinen onıñ yaqın göñüldeşi olğan ömür arqadaşı Hatice hanımğa, oğulları Bora ve Ayser beylerge, cümle soy-aqrabaları ve yaqınlarına teren taziye bildirip, sabırlar ve baş sağlığı tileymiz.

Merhum Allanıñ rahmetinde, canı cennette olsun!

Qırımtatar Milliy  vekâletli qurumnıñ azaları

Author: Редакция AVDET

Редакция AVDET