Ramiz Netovkin

11.02.202112:56

Ramiz Netovkin 1960 senesi Taşkent vilâyetiniñ Almazar qasabasında doğdı. 1975 senesinden berli Qırımda, Qarasuvbazar şeerinde yaşay. 1980 senesi Aqmescit N. A. Samokiş adına bediiy oquv yurtunı bitirdi. “Qarasuvbazarnıñ keçmiş, şimdiki ve kelecek zamanını tasvir etken eñ yahşı eser” kategoriyasında “Qarasuvbazarnıñ civarları” albomı içün Bekir Çoban-zade adınaki mükâfat laureatıdır. 1983 senesinden berli vilâyet, cumhiriyet ve çetel sergilerniñ faal iştirakçisidir. Şahsiy sergileri Aqmescit, Bağçasaray, Kezlev, Aluşta, Moskva, Tartu (Estoniya), Varşava, Lüblin (Poloniya), New-York, Kastamonu (Türkiye) kibi şeerlerde keçirildi. 1989 senesi Sovet Sotsialistik Birligi Cumhuriyetlerniñ ressamlar birliginiñ azası,  Qırım Muhrar Cumhuriyetiniñ nam qazanğan ressamıdır. Eserleri Qırım, AQŞ, Kanada, Felemenk, Almaniya, İsrail, Türkiye, Çin şahsiy kollektsiyalarında saqlanmaqtadır. Usta 2011 senesi iyül 21 künü vefat etti ve Qarasuvbazarda defin etildi.

Güzel Qırım bediiy mektebinden keçken ştrih ve çizginiñ virtuoz ustası, öz icadı devamında peyzaj janrına ve Qırım, onıñ keçmişi ve kelecegi mevzusına sadıq edi. Bu vaqıt içinde öz şahsiy bediiy icra tarz ve üslübini işlep çıqardı. Bu tarznı eminliknen “Qırım tarzı” dep adlandıra bilemiz.

Vatanğa qaytuvnıñ kederli bahtı ve ebediyen ğayıp olğanlarnıñ keri qaytarmama facialı imkânsızlığı, onıñ sanatınıñ şeffaf leytmotivini teşkil etmekte. Ressam, keçken eskilikniñ bütün alâmetlerini qayd etip, tasviriy sanatnıñ canlı, mecaziy tilinen, Bağçasaraynıñ tarihiy keçmişine doğru öz fikir ve duyğularını ifade etmektedir.

Bağçasaray, ressam içün yalıñız Vatan degil (ana tarafından tamırları Eski Yurttandır), ayrıca er vaqıt icadiy ilhamnı ala bilecegi bir şeerdir. Ramiz Netovkinniñ peyzajlarında tabiatqa doğru riayet etilmesi hastır. Ressam er çalışqan yerde tabiatnı diqqatnen ögrene edi, meselâ: belli bir ev relyefine uyğun orta asır soqaqlarını, acayip qayalarnı, dürbelerniñ qubbelerini.

“Efsaneviy Bağçasaray”, “Asret”, “Eski divarlar ögünde”, “Bağçasaray basamaqları”, “Eski Yurttaki ana-baba evi” kibi şairane adlı eserleri grafik saifelerinde Bağçasaraynıñ keçmişine coşqun, eyecanlı, kederli ve ğamlı davranışı oqunmaqtadır.

Ramiz Netovkinniñ “Yaz Baĝçasarayı”, “Hansaray”,  “Soqaq”, “Çürük suv yanında köpürçik” adlı eserleriniñ lirik obrazları başından yengil ve nefis, şeffaf avanen qaplanğan, olar öz asret alınen ana-vatan ile alâqalıdır, olarda “topraq ve qader nefes ala…”.

İfadeli ve nefis akvarellerde ressam özüni  daa serbest, erkin ve belâğatlı köstermektedir. Ustanıñ eserleri teren mündericeli, özünde keniş duyğulı ve felsefiy başlanğıçnı taşımaqtadır. Eserler bizni gizli sessizliginen celp ete ve güzellikke seyir etmeknen bizge tınçlıq ve zevq duyğusını bağışlaylar.

Рамиз Нетовкин

https://avdet.org/ru/2020/01/09/ramiz-netovkin/embed/#?secret=jKNTBIAf5p
  • OLYMPUS DIGITAL CAMERA
  • Digital StillCamera
  • Digital StillCamera
  • Digital StillCamera
  • OLYMPUS DIGITAL CAMERA
  • OLYMPUS DIGITAL CAMERA
  • Digital StillCamera

Author: Редакция AVDET

Редакция AVDET