Ayşe Yunus: Saba… ana-baba ile başlay

11.11.202120:15

Qırımtatar ailelerinde büyükler er vaqıt ürmet etile edi. Ve aileler patriarhal edi (amma bu hususiyet, bu künleri, ğaliba, sıq rastkelmez).

Oquyucımız Ridvan İbraimov, Abibulla dedesi ve Fazile qartanasınıñ (fotoda) evinde üküm sürgen aile tarzı aqqında aytıp berdi. Olar daa 1930-ıncı yıllarda evlendiler.

Toydan soñ Fazile, doğmuş Yancu köyünden qocasınıñ Foti Sala köyüne köçti. Ailede sekiz bala doğdı, amma sağ tek beş qaldı: Naciye, Osman, Ruslan, Yusuf ve İsmet. Eñ büyügi sürgünlikte açlıqtan, eki kiçik balaları ise Namangan vilâyetinde hastalıqtan öldi.

Abibulla dede ve Fazile qartananıñ ailesinde büyüklerge ürmet etme müiti üküm süre edi. Qarısı qocasına tek «siz» dep hitap ete edi. İç kimse aile başına qarşı kelmege cesaret etmez edi. Balalar ana-babasınıñ ellerini ala ediler.

Abibulla dede ve Fazile qartana kiçik İsmet oğullarınen yaşay ediler. Er saba endi büyük oğulları, işleri içün hayır duasını almaq içün ana-babasınıñ evinde toplana ediler. Nevbetnen degirmenni çekeler ve qave içip, meselelerini ve künlik planlarını muzekere ete ediler. Soñunda dua oquy ediler. Bu adet er künlik edi.

Abibulla dede doğmuş Qırımını körmeden, 1980-inci yıllarnıñ soñunda ğurbette vefat etti. Fazile qartanağa ömüriniñ soñ yıllarını vatanda keçirmege qısmet oldı. Torunınıñ balasını körip, 2001 senesi vefat etti.

Menba: The QIRIM

Находки Айше Юнус: Утро начинается с… родителей

Author: Редакция AVDET

Редакция AVDET