Peyğamberimiz (s.a.s.) qoranta başı olaraq

10.02.202212:16

Peyğamberimiz Muhammed Mustafa (s.a.s.) – öz maiyeti ve tabiatı ile bütün inasanlıqta, şu cümleden  diger peyğamberler arasında ayrı yer tutqanı şübesizdir. Allahnıñ rahmeti ile insanlarğa yaşayışnıñ er saasında, er vaziyette özüni doğru alıp barılması içün mükkemel örnek yollanıldı. Peyğamberimiz (s.a.s.)niñ cemiyet, qoranta, çeşit ayatiy allarda areketleri, sözleri –  bizim içün bir körgezmedir. Onıñ içün, Muhammed Mustafa (s.a.s.)niñ cemaat erbabı, yolbaşçı, maarifçi, terbiyeci, qoranta başı olaraq sıfatını ögrenilmesi ve bilgenlerimizni öz ayatımızda amelge keçirmemiz pek müimdir.

Peyğamberimizniñ (s.a.s.) etrafında yüksek ahlâqlı cemiyet şekillendi, onıñ tesiri altında nice-nice insanlar caillik zulmetinden çıqıp oldı. Aynı zamanda da, Resullullah cemiyetiniñ parlaq bir birlemi olaraq bahtlı bir qoranta tizip oldı. Onıñ ailesine, qadınlarına, soñra da balaları ve torunlarına munasebetleri bizler içün eñ güzel nümünedir.

 Peyğamberimizniñ qadınları da maddiy tarafından tam temin olmasalar bile, istegen şeylerini almağa, istegen aşlarnı aşamağa imkânları olmasa bile, öz ömür arqadaşınen soñ derece razı ve bahtlı ediler. Peyğamberimiz (s.a.s.) cemaat ögündeki öz ciddiy ve emiyetli vazifelerine, pek meşğul olğanına, gece-kündüz Allahqa dualarda bulunğanına baqmadan öz ömür arqadaşlarına pek diqqatlı, adaletli, nezaket, ürmet, dost munasebetini köstere, olarnı eglendirmege, küldirmege ve atta ev işlerinde yardım etmege vaqıt tapa edi. Ondan da ğayrı, Peyğamberimiz, öz apaylıranen çeşit meselerini, atta cidiiy siyasiy vaziyetlerini muzakere ete, olardan bu, ya da diger alda nasıl areket etmesi kerekliginde mesleat soray edi.  Amma aslı da Peyğamberniñ (s.a.s.) mesleat ve tevsiyelerde ihtiyacı yoq edi, çünki qıyın vaziyetlerde oña ne yapmaq kerekligine Allah özü işaret ete edi. İşte, ne qadar ikmetlik! Öz qadınına ürmet köstermek, olarnen çeşit işler aqqında subetleşmek, onen paylaşmaq ve atta mesleat soramaq tek mümkün degil de, kerek olğanına bütün insanlıqqa kösterdi.

Resullüllahımız nümüneli baba ve qartbaba olğanı da şübe doğurmaz. O zaten balalarğa büyük ürmetnen yanaşqan, olarnı ayrı ve özgün şahıs olaraq qabul etken, olarnen oynamaq içün vaqıt ayırğan. Sevgi, şefqat, samimiylik ve merhamet, amma aynı zamanda haram ve yasaq olğan şeylerde qattılıq – Peyğamberimizniñ (s.a.s.) terbiyeviy esasları demek mümkün. Ve ayrıca şunı da aytmaq kerek ki, Peyğamberimizniñ (s.a.s.) aytqanları ve yapqanları er vaqıt teñ kele edi, bunıñ ile daa çoq söznen degil de yapqan işlerinen, areketlerinen terbiye ete edi. Bu da pedagogika ceetinden terbiyeniñ eñ mahsuldar ve effektiv usullarnıdandır.

İşte, Peyğamberimiz (s.a.s.) öz ikmeti, parlaq örnegi ile bütün dünya ve bütün zemaneviy ve kelecek nesiller ğururlanacaq bala ve torunlarını, yüksek ahlâqlı insanlarnı östürip, öz terbiye sistemasında bizler içün mukummel nümüne qaldırdı.

Dilâra ABİBULLA

Author: Редакция AVDET

Редакция AVDET